【爆相爆片】外籍男Road Bike行Autotoll 過香港仔隧道

更新時間 (HKT): 2018.05.07 15:30

【15:28更新】香港仔隧道公司回應稱,管道禁止行人或有人騎單車進入,若發現有單車或行人進入隧道會截停,並票控相關人士。

風和日麗嘅星期六(5月5日),剛考完DSE嘅鄭同學約埋朋友去赤柱泳灘影相行街,之後坐朋友車出九龍,當時2點幾佢哋架車沿黃竹坑道駛上香港仔隧道,點知去到收費亭停車俾錢嘅時候,就見到多咗架價值3萬幾蚊嘅Road Bike(公路單車)喺左面出現。佢話,個單車男戴晒頭盔,黑超同手套,仲著埋一套顏色好鮮豔嘅緊身衫褲,好鬼專業,但單車車速就唔高,只係路過大巴,貨車時都好小心明顯減速,係咁耷。

鄭生話,佢哋架私家車同單車擦身而過時,至發現個單車手好似係金髮外籍男,佢話第一次見到有單車入隧道,認為「當然有危險,就算(單車)靠邊行,有咩意外,後面嘅車有可能會耷唔切!」後果不堪設想。

由於鄭生架車行咗快線,同架單車嘅距離越拉越遠,佢雖然擰轉頭係咁望,但架單車都消失於車海,之後佢哋就經紅隧去九龍,唯有祝單車男佢好運。有單車手話,外籍男架Road Bike價值3萬幾蚊,相信佢都係單車發燒友,不過踩入隧道就好危險,下次唔好啦。

《蘋果》問過警方,阿Sir話上述時間無接到有單車駛入香港仔隧道嘅報告,不過有隧道公司職員就話香港仔隧道係禁止單車駛入,間中一年都發現幾架單車誤闖隧道,職員會截停單車作出票控。

單車教練梁志賢話,單車若駛出馬路便要遵守交通規例,如在馬路行駛時要與大型車輛保持距離,另外,法例規定紅隧,東隧,西隧等收費隧道及屯門公路,東區走郎及觀塘繞道等快速公路均禁止單車駛入,相關路段當局均會豎立禁上單車及行人使用的路牌,單車迷要留意啦。

香港仔隧道公司回覆《蘋果》指,隧道管道內有閉路電視及員工監察,因管道禁止行人或有人騎單車進入,若發現有單車或行人進入隧道會截停,並票控相關人士。按現行法例,誤闖管道最高可罰款5000元及入獄6個月。隧道公司又指,上周六下午未發現有單車進入管道、但同日傍晚6時則曾截停一輛單車。

追實城中突發大小事,即 like 蘋果【現場】FB!
BannerBanner