【網上熱話】九巴越雙白線逆線爬頭 涉事車長遭紀律處分

更新時間 (HKT): 2018.06.20 20:56

幾時都話揸車切忌心浮氣躁,揸巴士更加要特別小心,因為過百人嘅生命安全,就掌握喺車長手上,但噚日就有一架九巴差啲炒車,真係險過剃頭。

事緣朝早7點幾,有司機揸車沿天水圍天瑞路往天耀方向行駛,當去到天瑞輕鐵站對開嘅斑馬線,對面線有幾架車等緊轉燈,點知尾隨嘅276A線九巴,突然喺雙白線抽頭,打算爬頭,由於條路好窄,每次只係夠一架車經過,九巴呢個動作,變咗逆線行駛,成架車過咗對面線。有網民話,呢個燈位可以左轉或直行,有唔少心急司機經過呢個位都唔守規矩,爬頭直行,而且呢段路段係輕微落鈄,一旦九巴撞埋嚟,後果真係不堪設想!

《蘋果》睇番資料,喺上個月同一個位置就曾經發生過致命車禍,一名70幾歲嘅阿婆俾綠van撞死。九巴發言人對事件致歉,公司已經接見涉事嘅車長並作出紀律處分,發言人話公司嚴格要求車長喺任何情況下,必須遵守交通規則。

追實城中突發大小事,即 like 蘋果【現場】FB!
BannerBanner