【引渡惡法】小店紛紛撐示威者非暴徒:他們只是為了社會的將來去抗爭

更新時間 (HKT): 2019.07.02 19:45

7月1日晚上有學生及示威者發起攻佔領立法會行動,今日凌晨4時特首林鄭月娥聯同一哥盧偉聰、保安局局長李家超等多名官員召開記者會,強烈譴責學生暴力,藉「立會事件」大打輿論戰,誓把示威者包括學生「定性」成有暴力傾向的罪犯。但一群曾多次以行動聲援學生及反送中遊行的小店店主堅持不改初衷,繼續撐年青人抗爭以爭取自由。他們呼籲大眾應先了解整件反送中事件的前因後果再作判斷,「學生及市民無論點克制、點樣想和平理性去進行(運動)都好,但政府只係不停激嬲你,最終導致衝突升級。」有小店店主則呼籲,反送中的市民及學生應該團結,包括齊登記做選民及投票以求在議會踢走保皇黨,香港才有希望。

記者林穎嵐 徐雲庭

「佢哋唔係暴徒。佢哋只係用緊一個我哋唔能夠馬上接受嘅方式(去抗爭)。」銅鑼灣手工藝品店「Glimpse Workhop」店主Raymond曾參與多次反送中運動,上街遊行、罷市、企街站、加入「有種小店」活動,「佢哋做緊嘅嘢,佢哋嘅行為、信念、用嘅方式,其實我一路都支持。」他認為反送中運動的年輕人,正在用一些聰明而且是年長一輩不認識的方式,進行反對行動。

「(攻佔立法會)呢件事嘅處理方式我雖然唔認同,但我明白、亦知道佢哋點解要咁做。呢班後生仔佢哋做緊呢啲嘢,佢哋好明白佢哋嘅初衷和目標,佢哋亦知道整件事嘅後果,佢哋真係知道!」他直言年輕人並非貿然去選擇衝擊立法會,而是經過深思、兼作出隨時要奉上個人前途及人生的決定。「(係)政府迫佢哋出嚟。每個人想要一樣嘢,當然期望對方俾回應,搵一個合理理性方式去溝通,達到一個共識,但似乎呢一個月,無論幾多人上街,年輕人做啲咩都好,政府根本冇嘗試行出一步做溝通,正如昨晚林鄭出嚟話,其實都係冇得傾。」

Raymond坦言看過林鄭昨晚的記者會後,除了憤怒外再沒有其他情緒,「我知我哋唔可以絕望,但對住呢個政府我哋真係無奈。」他坦言政府一次又一次不回應學生及市民,每次如同錄音機的回應,才是昨日攻佔立會事件的導火線。「望住立法會現場直播畫面其實好痛心,你知道呢班後生仔隨時要坐監、受傷,你作為一個喺呢個社會生活多年嘅人,我哋冇咩能力去幫佢地,你睇住嗰啲畫面,你只能夠喺心入面為他們打氣。」Raymond認為市民雖然無力,但希望大眾明白「將來社會係交畀佢哋,要俾佢哋用自己方法去爭取佢哋想要嘅嘢......如果我哋可以深入了解成件事背後所有過程,大家出發點和動機,我哋或者可以接受呢件事。」

另一名曾多次罷市支持反送中運動的「火之訊專業維修專門店」店主陸先生則質疑,事件發生至此與警方昨日行動有關。「我覺得件事有啲過火,但警察有啲擺空城計嘅感覺,原因係我5點幾我見到電視直播,啲警察嘅防暴槍懷疑已上晒膛,但到咗夜晚九點幾警察突然間走晒,好似由佢哋衝入去立法會。」對於凌晨一哥盧偉聰指警員昨晚突撤離立法會,是因發現示威者干擾電力裝置等原因,陸先牛認為是廢話。

陸先生表明即使學生攻佔立法會,他仍然會支持學生,不會放棄支持抗爭運動,因他了解學生們選擇衝擊的主因,「連一開頭話幫佢哋嘅民主派,到最後都懷疑出賣佢哋,佢哋絕望係理所當然,我覺得佢哋好可憐。」他又說:「我噚日一開頭睇直播時都覺得,呢班小朋友唔知做乜?(但睇到最後)我明白佢哋係想效法太陽花運動。」他認為各人有不同政見需要尊重,「唔係一味話佢哋係暴徒!」他呼籲大眾若要繼續抗爭,必先停止建制派在議會佔過一半議席,「香港好多人冇做選民,去登記做返,投返啲幫到自己嘅人,唔好再俾建制派喺立法會玩晒。」

時裝店「La flench」店主余先生過去一個月多次參與遊行及罷市,他覺得昨晚發生攻佔立法會事件是因為示威者「被誘發」。他認為前線衝擊者在經歷多次遊行後,但仍未得到合理回應,「漸漸會覺得要衝擊先可以強烈表達到佢哋意見,佢哋都有表達自己意見嘅自由。」余先生坦承目睹衝擊一刻感覺很震驚,「但諗深一層佢哋都係被激發,一定係被香港最大嗰位(特首激發),政府基本上係咩都唔回應,令到每個人都覺得好不忿。」他估計攻佔立法會的學生在憤怒下,甚至覺得「犧牲自己都唔緊要」,「其他人係冇得講話認唔認同。」

雖然坊間不少人人批評昨日佔領立法會行動是暴徒所為,但余堅持「呢啲根本唔係暴徒」,理由是「暴徒係因為私人、自私嘅利益去做一件破壞社會嘅嘢,但佢哋呢個佔領行動完全唔係為咗自己,係為咗守護社會共同理念!」

7月4日起 《蘋果動新聞》只限升級壹會員閱覽 繼續撐蘋果!

追實城中突發大小事,即 like 蘋果【現場】FB!
BannerBanner