【光復屯門】獨家專訪!Happy伯自揭10年派300萬打賞畀大媽:最緊要開心

更新時間 (HKT): 2019.09.19 06:00
Happy伯在生日會使出招牌舞姿,全場馬上歡呼。張軍攝
(蘋果日報)

「我10年喺佢哋(大媽)身上使咗300幾萬!」在屯門公園與性感娜娜大跳辣身舞的Happy伯瞬間成為「網紅」,更因此引發一場「光復屯門公園」行動。《蘋果》找到他做獨家專訪,他對「大眾契爺」稱號非常受落,還直認在公園收了10個「契女」,當中包括新寵娜娜,而他最喜歡是「小紅」,至少派給她100萬元,更為她搞生日會送上99支紅玫瑰,「我啲錢多到用唔晒,最緊要開心,好值得!」

一身Hip Hop潮人打扮的Happy伯,原來已達83歲高齡,他自言姓陳,是海豐人,3歲來港,育有一子一女,現時跟兒子及孫兒住在屯門,與太太則分開住。至於他經常大派利是,並不是裝豪氣,而是真正的「隱形富豪」。陳伯90年代起在武漢設家具廠,之後交由兒子打理,現擁有10多個物業收租、股票投資等,生活無憂。對於持續逾3個月的反送中運動,Happy伯直言理解年輕人,反指林鄭處理手法不當:「好多嘢特首搞錯咗,到而家都感覺到佢係大晒,呢啲就唔得,睇到咁嘅環境,你做特首應該就吓人。」

退休後百無聊賴的他開始「蒲」屯門公園,20年前只有老人家吹吹簫、彈彈結他,「我都有彈,但冇人睇,直至06、07年,大陸婆嚟,就有人開始畀紅包, 10幾20檔咁,最高峰時(公園)有成5,000人。」他自言一聽歌就開心,「見人跳舞,我就走出去跳,一開心就畀錢,即使身上冇錢,我都即刻去碌卡(提款) !」自此,他每次到公園都隨身帶備3,000、5,000元利是。

被冠以「大眾契爺」稱號,全因過去10年,陳伯在屯門公園收了10名契女,自言派了300多萬元,有契女更因而發大財買車又買樓,他指最喜歡看「小紅」,10年間至少派了100萬元給她,「佢唱歌一流,佢認第二,無人敢認第一!」更即席展示與她在生日會上的合照。至於新寵娜娜,陳伯就愛她夠年輕,大讚她跳舞第一,每當說到她,陳伯也心花怒放,臉上難忍對其疼愛之情。

陳伯不諱言,除了到屯門公園外,契女們的茶會、生日會亦例必出席。早前記者亦潛入「小兔生日會」,見識了陳伯的氣派。當日他早已預備大疊10元、100元,甚至500元大利是。2小時內已派了6,000元,數口精的他用紙仔逐一記錄向各人派了多少錢,更說娜娜一定要派最大份,「一小時唱15首歌,娜娜我一定(要佢)唱超過15首歌,一定派超過2,000。其他人,每人派400、500元。」

對於外界指大媽們貪錢才黐埋身,心水清的陳伯也不是老懵懂:「人係咁㗎喇,但唔好計較,最緊要開心!」至於有否跟契女們發生性關係,他斬釘截鐵說:「絕對冇,我從來冇要求過,(佢哋主動呢?)唔好講,唔講得。……我做得正,唔係鹹濕,人哋點講我唔理!」對於他與性感娜娜大跳辣身舞的片段在網上瘋傳,女方主動摸心口,而他亦表現出享受表情,遭外界批評不雅兼有傷風化,他亦因一句「我唔係鹹濕,係happy」而聞名。

他指當日是娜娜主動埋身,「但佢唔係有企圖,佢知我性格,亦唔係侵犯佢,只係因為佢跳得狂野,表現出男女間嘅舞!」事後他有提醒娜娜不要穿得太性感,跳舞也不要太過火。

不過他坦言見過有領政府綜援、生果金的阿伯,為大媽花盡錢財,感到可惜,「佢哋10蚊10蚊咁畀,20個就畀200蚊,一個月就6,000蚊,連食都冇得食。我見過2個,錢冇晒,谷氣死咗。」他曾勸其他老友記量力而為,但有時「真係忍唔住」,「阿伯好簡單,(大媽唱着歌)走過嚟,叫佢哋支持,阿伯聽到就好開心,於是支持,一個支持,10個20個要支持,一個月3,000、5000蚊,咩都冇。」

不過大媽噪音滋擾民居亦犯眾憎,陳伯也認同:「佢哋(大媽)為咗唔輸畀隔離檔,就大聲過人,不停boom boom boom,我都覺我係(騷擾),我曾經提佢哋唔好咁大聲,因為遲早玩完,而家咪玩完囉!」結果大媽們齊齊暗地轉戰酒樓開Party,到屯門公園獻唱變成Fan Meeting(粉絲見面會)。

事實上,這類酒樓宴會相當頻密,一星期約有3場。記者早前參加過另一場「小月生日會」晚宴,形式大同小異,但大媽刮錢更狠。輪流繞場唱歌環節,更是大媽收「打賞」黃金機會,轉眼間人人手上拿着一大疊利是。坐在記者旁邊的伯伯像是很有經驗:「咁樣先刮得多,刮得快!如果你覺得肉赤咪去廁所或出去食支煙囉!」

當日生日會下午4時入席、晚上11時結束,當日未見有Happy伯出現,但仍有其他伯伯大灑金錢,其中一名紅裙大媽挨身貼着記者身旁的伯伯,雙手捉住其右手掌不斷搓揉;另一黑裙大媽隨即撲來大叫:「契爺,見到你好開心呀。」作勢飲交杯酒又落力揉阿伯肩膀。記者大讚伯伯全場最受歡迎,他笑笑口答道:「佢哋係歡迎銀紙啫!佢哋搵食,我開心又有錢,咪畀囉!」

據知,酒枱都是各大媽認購,扣除一圍約2,800元成本,門票收入一圍執300元;大媽一次舞宴演唱約4輪,扣除100元予琴師,然後每唱一首歌打賞利是予主持及琴師,以每枱10名食客計,大媽每輪收約千元利是,連同跳舞打賞,出席一次舞宴收入最少4千元,是在屯門公園賣唱的倍計。

追實城中突發大小事,即 like 蘋果【現場】FB!
BannerBanner