【續命器官】患膽管閉塞男嬰獲捐肝活命:感謝你的捐贈

更新時間 (HKT): 2019.09.27 00:01
Helen重遇移植了去世女兒肝臟的男童鋒鋒,坦言仿如見到女兒重生,十分安慰。金敏琍攝

「小天使,多謝你的守護!天國快樂!」患先天膽管閉塞的男嬰鋒鋒,5年前的今日仍為生命搏鬥,急需換肝續命,當年的11月9日,7個月大的鋒鋒終於獲得肝臟移植得以重生,救他一命的肝臟來自同日去世的13歲少女傅煒婷。鋒媽Ivy其後接觸到煒婷媽媽Helen結為朋友,她視煒婷為兒子的活命小天使,每年煒婷生忌及死忌,都向Helen送上祝福慰問。

記者:金敏琍

鋒鋒是Ivy的細囝,2014年3月出生,出生時他是懷胎7個月的早產七星仔,由於器官尚未成熟,出現小腸氣、膽管閉塞等大大小小情況,甫出生就要送入嬰兒深切治療部,靠儀器維持生命,醫生告訴他鋒鋒要移植肝臟,作為母親的Ivy痛心及徬徨,「嗰刻係黑晒喇個天,晴天霹靂,唔識點去表達,唔知要點做。之後就係姑娘同醫生開會話要器官移植,否則係等死。」

鋒鋒3個月大時,因發燒入院後一直留醫,令家人十分擔心。鋒鋒捱了4個月,直至11月初,醫院通知有合適屍肝可以移植,Ivy表示那刻心情「沉一沉,因為代表有人死咗,但有啲幸運,原來有機會可以好返喎,但又擔心個手術會否帶走佢,咁細個要做咁大個手術,會有好多問號,心情好複雜」。

幸而鋒鋒的換肝手術順利完成,目前健康快樂成長,Ivy對醫護人員及無私捐贈者十分感恩,認為是人間有愛,「手術後好感恩,好感謝醫護人員同捐贈者,佢嘅家人,我唔知係邊個捐,無人會講,都係手術後成個月,我寫咗張心意卡想畀佢屋企,我知唔可以搵,叫佢哋轉交。」

其後,煒婷捐器官救人的事件獲傳媒報道,Ivy才知道兒子的救命小天使身份,「我覺得佢真係好偉大好大愛,小妹妹家人個決定幫到好多人,唔係淨係鋒鋒,仲幫到其他人,可能係一個決定影響好多家庭同好多人嘅命運,真係好感激」。同是為人母親,她感受至深,「作為家人,當刻嘅決定好緊要,仲要傷害佢哋係傷上加傷,真係好偉大」。

過去5年,Ivy及煒婷的媽媽Helen交上朋友,兩人經常互發短訊問候,Ivy對Helen當日的決定心懷感激,她亦經常告訴鋒鋒,煒婷就是他的活命小天使,她常把兒子的近照及近況發給Helen,讓她知道鋒鋒的健康情況,兩家人交上朋友,經常見面。

Helen亦非常喜愛鋒鋒,認為在他身上感受到煒婷的存在,早前兩家人相約酒樓飲茶,記者亦在場,只見5歲的鋒鋒非常活潑,經常「坐唔定」,他與Helen亦非常熟絡,Helen看見鋒鋒健康成長十分安慰,她認為鋒鋒喜歡攬毛公仔,有着女孩子特質。午餐過後,鋒鋒見到夾公仔機內的小松鼠毛公仔囔着說喜歡,Helen二話不說替他圓夢,出錢出力替他夾了個小松鼠公仔,之後鋒鋒又跟着Helen去她的家裏玩耍。

Ivy直言對Helen捐出女兒器官救回鋒鋒性命十分感激,「佢真係好似我長輩咁,教我點照顧佢,我好似多咗個朋友,峰峰多咗半個媽媽,佢成日問峰峰點,真係人間有愛。」Ivy說現時作出身教,經常將助人精神向兒子灌輸,希望能延續煒婷的大愛精神,「我繼續向朋友灌輸呢個概念,真係幫到人,就算捐完器官,拎返個遺體都係火化,都係損失一部份少少(骨)灰啫」。

追實城中突發大小事,即 like 蘋果【現場】FB!
BannerBanner