【武漢肺炎】車牌到期冇得walk-in續牌 近萬車主被迫停牌

更新時間 (HKT): 2020.03.26 13:46

【18:19】運輸署增加網上預約續領駕駛執照/車輛牌照及申領國際駕駛許可證名額至每日4,500個後,預約日期已明顯加快,最快預約期為4月中。

近日運輸署牌照事務處不時上演罵戰,人人變身「㗦嘈哥」、「火爆姐」,更曾有多人鼓譟要報警求助。全因在武漢肺炎疫情下,公務員1月29日起推行「home office(在家工作)」,而牌照事務處亦於2月10日暫停即時續牌申請服務,至今仍未重開,強制所有人透過郵寄或網上遞交申請,惟不少車輛行車證過期,卻半個月仍未辦妥,令全港不少搵食車車主及司機無辜「被停牌」手停口停,亦有車行旗下多部車受影響,逾百萬資金被砸死,更有中港貨車因等不到新行車證如常開工,結果慘食「牛肉乾」。運輸署雖然已加強人手全力處理8成的申請,惟至今仍有近1.8萬宗續牌申請未解決,《蘋果》估計或近萬私家車及搵食車因此被迫停駛或停工。

記者:郭美華 梁德聰

《蘋果》近日在深水埗區發現不少行車證過期的車輛隨處停泊,單是南昌街、汝州街一帶至少有6、7部車,當中以私家車居多。而上月23日,青山公路洪水橋發生一宗綠的撞斃女途人車禍,肇事71歲司機所駕的新車的士行車證亦逾期2日,他最終以涉嫌危險駕駛引致他人死亡被捕,警方正調查該的士行車證逾期事件。

大量車輛行車證過期,與運輸署早前實施的在家工作有關,運輸署指,在2月10日至3月20日期間,經投遞箱及郵寄共收到超過17萬份申請,當中七成為車輛牌照相關申請,截至3月20日,仍有一成半未完成處理,即多達17,850份仍未處理。

運輸署每年平均處理超過83萬份續領車輛牌照申請,包括私家車、輕型貨車、中型及重型貨車、小巴、巴士等,以往車主可親身到運輸署轄下4間牌照事務處的即時申請櫃位排隊辦理,亦可委託車行、保險公司、銀行代辦等,一般即日完成,惟近日不少車主及司機卻因遲遲未能成功續期,出現無辜「被停牌」情況。

記者日前到過金鐘和長沙灣的牌照事務處直擊,發現朝早已大排長龍,門外分兩條隊,其中一條是只處理已網上預約申請,另一條則是「詢問處」,多名職員維持秩序,每名進入市民必須先量體溫及戴口罩,並用搓手液清潔雙手。

不過「詢問處」卻變成「質問處」,「我個牌就快到期,點算?」、「如果個牌過咗期未續領到,我仲可否揸車?」不少車主表現得不耐煩心急追問,但職員只着他們網上預約。記者也上前查詢,得知預約最快都要等到6月。

不少市民大感苦惱,其中專程請假來續牌的私家車主劉先生怒氣冲冲,其行車證下月4日到期,惟他到場後得知運輸署取消即日辦理櫃位,而網上預約最快要到5月尾,「我咪繼續揸囉,唔理佢,抄牌咪上嚟(運輸署)投訴囉。」他批評運輸署做法是引發「第二次暴動」。

長沙灣牌照事務處更有車主報警求助,警方出動4名軍裝警仍無法撳住對方的怒火,「而家我攞返個牌唔續得唔得吖?等咗9日喇!」據知,他因為郵遞了文件處理牌費續期,但等了9天卻沒有回音,遂親身到場了解,惟排隊等了4小時卻不獲接見,氣得七孔生煙。

事實上,運輸署由2月10日起,暫停即時申請櫃位,改為在門外設立4個供不同牌照申請的投遞箱供人交表,承諾10個工作天內完成,並以掛號形式寄回車主。雖然署方貼出告示,稱會增加網上預約續牌名額至每日4000個,預約日期由8周增至10周,但牌照處每天仍逼滿查詢市民。

苦主1:客貨車主根叔

「我今朝收06(清晨6時),原本下午有另一個job,但我行車證今晚12點就期滿,唔敢接,𠵱家都唔知幾時先開得返工!」50歲的根叔揸客貨van近30年,主要送報紙、送貨去工廠、送菜、接送藝員出外景拍攝等,日做21、22小時,除初一、二外,可謂年中無休。

訪問當日,正是其客貨van行車證最後限期,其實他早於3月10日已交齊文件予車行,代為向運輸署申請續牌,但因肺炎疫情,運輸署暫停轄下牌照事務處即時申請櫃位,改為投遞申請,他至今仍未收到新的行車證,「以前頂多等兩日,依家等咗11日都未有。」訪問期間,電話響起,有人叫他開工,但因行車證期滿,他不敢接,「呢幾日已經推咗3個job,冇咗6,000蚊,車行話可能要等到3月尾,所以我連4月1日4,000蚊嘅job都唔敢應承,真係好心痛!」

根叔是一家三口經濟支柱,除了養妻活兒,又要供樓、供養父母和外母,加上車輛開支如停車場、油費等,日做夜做,高峰時月入可達7、8萬,但去年起因受反送中運動和近日疫情影響,柯打大減,月入大減一半,扣除開支所剩無幾。「𠵱家加埋運輸署咁搞法,我都唔知點算!」根叔被迫放悠長假期,「表面好似好爽,瞓到自然醒,但醒後幾秒諗起乜都係開支,就開始返回現實!」

他指臨近行車證期滿前幾日,每日返家都失眠,眼光光等天光,擔心無工開,現在噩夢成真,他只好將已接的長期工作外判,「例如每朝送報紙到私人屋苑,我要額外倒貼400蚊搵人頂,電視台拍外景,頂更嘅人要收多100蚊先肯,我都要硬食㗎喇,連同開不到工每日損失約2,000元,10日就冇咗2萬蚊,足足夠供樓一個月喇!」

他曾想過開大膽車,但擔心被警方抄牌,「到期可能唔係只抄你無有效行車證,可能話你改裝車輛要勾車返去,一旦發生交通意外,唔係你撞人,而係人撞你,都可能要賠好多錢,冇必要真係博唔過。」他指現時只好望天打卦,等待新的行車證寄來。

香港客貨車司機協會副秘書長馮振邦表示,該會逾千名會員中,約3至4成司機也出現同樣問題,平均等逾一個月才收到新的行車證,令不少司機手停口停,被迫停工。據他所知,部份貨車司機為生計,無奈開大膽車繼續接單,他直言貨van平均一日收入1,000元才夠維持開支,「尤其是供車司機,加上近月生意因疫情轉差,有生意嚟都要做。」他促請運輸署重開部分即時續牌的櫃位處理行車證將近期滿的申請。

苦主2:中港貨車車主黃先生

「我以為投遞入箱已經兩星期,應該搞掂啦,我哋要搵食咪繼續開工,點知俾警察抄牌,話『沒有展示有效行車證』,抄牌翌日,我先收到運輸署嘅新行車證,真係好憤怒!」港人黃先生從事中港運輸生意,持有兩部拖頭車,主要穿梭中港運載水果、電子產品等,兩部拖頭車的行車證同於3月中到期,他早在3月初已完成驗車,並到運輸署辦理續牌手續,「點知運輸署冇開門,我又唔知,電話又冇人聽,我問代理,對方說要預約或投遞。」

黃先生其後委託代理將文件投遞入箱,「我已投遞2星期,我估應該買咗(牌費)啦,我都要搵食嘛,惟有繼續開工囉!」怎料,其中一拖頭車被警察抄牌,包括「沒有展示有效行車證」及違例泊車,分別罰款450和320元。結果抄牌翌日,新的行車證寄來,令他大感不滿,「佢搞咁耐都未完成,我又查唔到進度,乜都唔知,(署方)失晒聯絡,好彩我只係抄咗張牌,如果發生意外,保險都唔賠就大件事喇!」

黃先生現時持有另外30條拖架,已完成驗車,行車證即將到期,亦擔心隨時等候二、三周仍未能續期,最憂慮是投遞的文件中包括正本牌簿,「一旦唔見咗,咁點算,重新搞嘅手續非常繁複,而且呢度唔係1、2條拖架,而係30條。」令他感到相當徬徨,「一個拖架每日搵4,000蚊一轉,如果停工一周,即係冇咗2.8萬蚊。」他不滿道:「我哋運輸界都為疫情做嘢啦,冇牌費,我哋點行呢?如果大家一齊匿喺屋企,大家咪冇米食,連廁紙都冇得用啦!」他建議運輸署簡化網上申請續牌的程序,同時車主可上網查看進度,「如果知道運輸署入咗資料,續咗牌,即使未收到新的行車證,警察都可check到,我哋可以安心開工!」

苦主3:車行老闆徐先生

「買賣汽車、轉名過戶,一部車我至少要攞40萬元贖車,即日完成過戶就可攞返嚿錢,𠵱家過戶都要等2星期,搞到我啲資金砸死晒,如果一星期有2、3單買賣,我要砸死過百萬,係冇可能嘅!」經營重型貨車買賣的徐先生,同時為客戶提供續牌、汽車買賣過戶、轉牌、更改汽車資料如轉顏色、申請許可證等服務,當中為續牌最多,每月有50、60宗。近一個多月,每日由朝到晚接到客戶的追魂call,查問何時才收到新的行車證。

他指出,以往他們會到運輸署牌照事務處的即日櫃位排隊理辦,就算要排2、3小時,即日都可辦妥,但現時投遞,至少都要10個工作天。最誇張一例是為一名客戶轉名,2月25日已投遞申請,至今仍未收到,「個客出咗保險,等緊部車趕開工,𠵱家日日喺度等!」

最大問題是有客人來購買汽車,搞轉名過戶文件,由於其公司的汽車已抵押予財務公司,如成功賣車,「我們要抬錢贖車,一單約40萬元,要打40萬本票贖車,以往我即日搞過戶,即日去客戶上會的財務,我即日就可返錢,頂錢最多都係一、兩日,𠵱家因為運輸署搞過戶文件都要等2、3周,我至少要等2至3周先返到錢,影響好大!」

他又指,近日其公司有8至10輛新車推出,要為客戶轉車牌、轉顏色,「車身噴咗彩帶去驗,運輸署都只會畀你出主色,因此我們要重新畀車主簽名、再入(投遞)箱,又要等2周成功批准轉色後,再上財務、上會、落數後才交付新車,以往一星期完成,現在要等3、4星期。」

除了辦手續及開支大增,他還面對更大難題,就是安置多架重型貨車,現時惟有在辦公室對出空地放3、4輛,其餘暫放在代理商。他直言,該批車3月初準備,預計要到月尾才交到車予客人,「客要等成個月,其實我哋嘅車ready好,係等運輸署文件!」

苦主 4:私家車車主Conrad

「佢話投遞續牌申請最多10個工作天,但我足足等咗3星期先收到!」私家車車主Conrad的行車證於2月19日期滿,2月初他將車送去檢驗,至2月17以郵寄方式遞交續牌申請,「我預咗(行車證)到期都未攞到,最多都係影響一星期啫,點知等一星期、兩星期都未收到。」他家住掃管笏,巴士每小時僅一班車,故他駕車都是用作代步,加上疫情嚴重,駕車較為安全,不過,他坦言不敢隨處違泊,「因為行車證到期,警察最多發出『沒有展示有效行車證』告票,罰款320元,如果我同時違例泊車,就要加多320元。」

他知道運輸署有提供網上申請續牌服務,但申請人必須向郵政局申請一個電子證書,他4年內曾兩次申請,但手續非常繁複而失敗,「第一次係因為錯過親身遞交文件的30日期限,第二次係因為去錯咗遞交文件的辦事處。」他最終因未能成功申請電子證書而無法使用運輸署的網上續牌服務。

10多年前曾在澳洲讀書的他指,當年澳洲已可上網續辦車輛牌照,「相比下,香港運輸署到依家2020年,大部分人仲用緊人手填form,至少花一個半晝先完成,真係匪夷所思。」他指,明白疫情下,署方為避免人群聚集而改用投遞措施,但他認為署方應大力簡化網上申請的程序。

運輸署回應,署方已增派人手處理申請,如申請人的車輛牌照即將到期,可在遞交申請時在信封上註明,以便職員更快識別及跟進。由3月23日起,署方亦已逐步增加網上預約續領駕駛執照/車輛牌照及申領國際駕駛許可證名額至每日4,500個,可預約日期延長至10星期。

追實城中突發大小事,即 like 蘋果【現場】FB!
BannerBanner