大肚婆被捕|劉女士投訴後急急探早產B 稱愛兒一度發燒需脊椎穿刺檢查 心痛受苦聲淚俱下

更新時間 (HKT): 2021.02.11 00:12

孕婦劉女士早前在土瓜灣疑因警暴早產,事件引起全城公憤。劉女士今早在區議員陪同下,前往警總投訴4項警員懷疑不當行為,包括警員對她人身攻擊、態度惡劣、刻意拖延召救護車時間,以及把她拖行、抽起再掉在地上等暴力舉動。警方目前已為她錄初步口供「開file」,稍後會再要求她到警署錄詳細口供。他投訴完離開警總後,馬不停蹄又前往醫院探望愛兒,其間再講述自己心路歷程,

「不過好多人話投訴嚟都嘥氣,話佢哋會偏幫。」劉女士自言對投訴不感樂觀,預料警方調查不會達到公開公正,亦估計調查需時極長。不過她強調,只要有討回公道的辦法,也要一試。「我希望自己會係例外。佢哋處理事唔應該係咁樣!」

離開警總,劉女士立即到醫院探望兒子。每次到深切治療部探望兒子,都會觸動劉女士的情緒,一談起就滿眶淚水,隔着氧氣箱望瘦弱嬰兒,劉女士只能用「崩潰」兩字形容心情:「呢幾日佢係咁嘔奶,一掂佢就氣促,搞到氧氣箱係咁着燈,我都唔敢再掂佢。」

劉女士提到,數天前一個夜晚突然接獲院方致電,指她的兒子發38度高燒。醫生生怕嬰兒患上腦膜炎,遂作脊椎穿刺檢查,但對一個早產嬰兒而言,這項可不是普通檢查。她接到消息後輾轉反側、整夜失眠,哽咽道:「佢之後可能會行唔到,咁細個bb要打一針……」

現時,愛兒靠氧氣箱呼吸、靠餵食管進食,體重輕得只有1.63公斤。「佢插住條管好唔舒服,係咁用手整開條管,塊面又紅哂,好辛苦。」眼見兒子難受,自己卻束手無策,滿身無力感,令她深明何謂切膚之痛,至今難以釋懷。

直至劉女士憶起一次與兒子的互動,眉頭才頓時稍稍鬆開:「有次佢擘大眼5分鐘,嗰次係我第一次同佢有溝通,已經好開心。」每星期僅有3次30分鐘的探望機會,作為人母的劉女士自然不會錯過,惟她需要每一星期自掏腰包做武肺檢測,才能進出ICU;再加上劉女士生育時大量出血,至今尚未調理休養好,經常滿身疼痛。然而面對諸多不便,為了愛子,她決定咬緊牙關強忍下去:「唔探我仲辛苦!」

距離兒子足月尚有近兩個月,這段時間對劉女士而言份外漫長。然而兒子足月後身體能否轉好,回到家中健康成長,至今仍是個問號。訪問尾聲,劉女士特別感謝主理醫生,形容若非有對方專業意見,情況或更加嚴重:「好彩佢23號都叫我留低,如果唔係,呀b冇氧氣箱,我又大量出血,真係一屍兩命。」

-----------------------------

你敢爆,我敢獎! 立即Signal 63836568、WhatsApp 《蘋果》24小時爆相爆片熱線

或致電:63836568

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

追實城中突發大小事,即 like 蘋果【現場】FB!
BannerBanner