舢舨激戰|無救生裝備偷雞載客 《蘋果》直擊全船人搵命博 市民冀發牌監管

更新時間 (HKT): 2021.03.28 15:53

由於爆出鴨脷排疑爭客引起兩船碰撞事件,碰撞過程更被網民拍下,引起熱議,事件引起水警及海事處關注,今日派出海事處船隻,以及多艘水警小艇在有關海域巡邏,令涉事的駁艇一度不敢埋岸接客,有行完玉桂山的行山人士一度滯留在等船的鴨脷排達數小時,有人選擇繼續等候,亦有人不惜行返回頭路攀山折返鴨脷洲。有行山客批評政府若要管制無牌駁艇,應公告天下,讓行山者不用等船返香港仔,「依家所有行山者都筋疲力竭,點行返去?」

在鴨脷排等候駁艇返香港仔的行山客約有50人,其中鄺小姐狠批「政府做嘢好唔啱,如果你一早覺得要懲罰佢哋(駁艇),要公告天下,大家唔好再用呢條route(路線)等船,因為係等唔到,又冇通知人,所有行山者已經筋疲力竭,點行返去,因為斷水斷糧,又筋疲力竭,中途行返出去出咗咩事,咪又搵政府嚟搞?又要出動直升機,行山人士安全好大問題。」

她又說,朋友以往行過這裏,好方便,所以一行四人到此,豈料遇上這事,「政府要管制冇牌船,應大事宣傳嘛,話畀行山者聽唔好用呢個方法走,佢突然放兩條巡邏船喺度,令人無法上船,應該以行山者安全為首要,如要有牌船,要公告天下,唔係出咗事,即刻斬腳趾避沙蟲,政府要有長遠考慮,第日要唔要發牌畀駁船。」

其後有行山客聯絡上英姐,英姐說為避開水警與海事處,着客人在連接鴨脷洲與玉桂山的連島沙灘上等候駁艇,結果《蘋果》與其他行山客在下午1時許始登上英姐的駁艇離開。記者在船上觀察,眼見英姐的駁艇船艙內並無任何救生設備,當時亦載了15名客人,上船後每人支付40元,最後在香港仔水警基地隔離一個碼頭上岸,船程約10分鐘。

據悉,英姐除了到鴨脷排接行山客外,亦會在香港仔避風塘接載船家往返船隻及碼頭。而單以接載玉桂山行山客航線計算,粗略估計她一天可接載10轉行山客,以一船15人、收費40元計算,她單靠這條航線一天便能有6,000元收入。

由於船上無救生衣, 其中一名同坐的乘客岑先生表示「呢啲都要自己take個risk(冒風險),咁嘅價錢同咁短時間,呢啲要自己衡量。我唔覺政府會發牌,發了牌唔會trace到邊架船、邊個師傅揸邊架艇,唔會為咗咁細嘅平台發牌。」

問到有否看新聞知悉發生撞船事件,他謂「我乜都唔知」,「 我覺得撞船都係一時之氣啫,因為so far 好多年都冇聽過,可能天時地理人和,咁啱撞正個點,忍唔住團火一嘢撞過去,好多時人都係咁, 所以我覺得係個別事件。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

你敢爆,我敢獎! 立即Signal 63836568、WhatsApp 《蘋果》24小時爆相爆片熱線

或致電:63836568

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

追實城中突發大小事,即 like 蘋果【現場】FB!
BannerBanner