夫婦爭子|丈夫認曾酗酒出手打妻 慨嘆文化差異磨擦不斷

更新時間 (HKT): 2021.04.07 06:00

郭女士聲淚俱下,直斥丈夫及家姑藏起兒子,令母子分離,飽受相思之苦,過去前亦曾遭丈夫酗酒後家暴。本報成功接觸到郭女士丈夫鄭先生,他接受本報電話訪問時,得知事件另一版本。鄭先生指,是因疫情關係將兒子帶到福建暫居,同時亦是郭女多次在他工作地點大吵大鬧所致。他稱從沒阻止母子見面,並愛錫森森,替他報讀當地國際學校,慨嘆與妻子因中港文化差異致磨擦不斷,這段婚姻早已名存實亡。

對於郭女哭訴曾遭家暴,鄭承認二人過去爭有爭執,雙方都有動手,「如果是兩公婆嗌交是有,有時我過份些或者佢過份啲,或者佢冚我一巴我冚佢一巴,呢啲好閒咋,你知不知佢有心去裝我,整親少少佢會影相。」他又批評郭女性格霸道,「你知唔知,有啲人真係夾硬嚟,真係嚇親人,佢嗰種性格就係,郁下唔滿意、有啲咩,就同你攬炒!」

至於酗酒,鄭歸咎於婚姻不如意,令他感到迷茫,現時已決心戒除:「嗰排是因為她好竭斯底里,好似法官返屋企咁,咩事她都要同你理論,一定要理論贏你先覺得有意思,一個家庭其實要溫暖的家,而唔係好似法庭咁。」

分手後奉子成婚磨擦不斷

鄭先生憶述整段婚姻經過,指當初經舅母介紹認識郭女士,因中港文化不同,令二人價值觀迴異,拍拖時已產生分歧及磨擦,拍拖不足一年已經要分手,但未幾郭女士懷孕,無奈奉子成婚。

兩公婆多年來一直聚少離多,妻子曾帶同兒子到北京居住,即便在港期間,妻子也寧可晚上到契媽家中睡覺,早上才回佐敦家照顧兒子。鄭先生亦向記者表示,夫妻間已經有兩年多沒有行房,有名無實,去年因疫情關係,才要求妻子留在佐敦居所,以減低染疫機會,「我都已經瞓地下,叫佢同個仔瞓床。」

尋子事件觸發點是去年4月,郭女士稱完成企業培訓後,家姑未肯歸還兒子,鄭先生稱是當時妻子情緒非常激動,令他十分憂慮,「佢一定要28號接返個仔,我話29號放假先接,佢唔肯,仲拎唔知係遮定木,去我阿媽度大好大力咁敲門,報埋警,之後5月7日又影晒片話要跳樓,消防都嚟晒,佢咁樣夾硬嚟會嚇走人,我都即刻搬走咗。」

丈夫:大陸女人係咁樣思維模式

郭女士一直控訴丈夫及家姑將兒子藏起,但其夫鄭先生表示,從沒有阻止母子見面,郭女士去年4月多次到他工作地點大吵大鬧,他選擇辭職躲避,至今一直處於沒有收入狀態,加上疫情關係,遂於去年7月帶同兒子回福建暫居,並替他報讀當地國際學校K2,「我有打電話話畀佢(郭女士),佢知道我鄉下地址,我鄉下公司地址,係佢自己唔返去,我唔知佢留喺香港咁耐做乜,因為4月要上庭,我先返嚟香港。」

鄭先生稱,其妻於7月已經知道他偕兒子回福建,但仍選擇在母親地產店10月開張當日去「踩場」,只是為搞事,對郭女士斥家姑曾在地產舖對她動手,鄭先生辯稱母親只是用腳作出阻擋,「去年10月15號我媽間店舖開張,佢專登揀開張嗰日去搞人哋,我媽只係用隻腳點一點佢,話唔歡迎佢咋,唔關我媽事,佢所有嘢都要同我阿媽掛勾。」

說到尾,鄭先生認為郭女是「為身份證同為仔」,鄭先生在灣仔有一個自置物業,市值約600多萬元結婚多年,直至去年4月為止,亦有每月付家用,由7000至10000人民幣不等,「佢曾經講過拎身份證只係第一步,佢想要攞返個仔,因為攞到個仔就等於有長期飯票,大陸女人係咁樣思維模式。」

夫婦之間糾紛持續多時,目前鄭先生希望交由法庭判決,「錢冇咗可以再搵過,我淨係想要自由,佢搞到我已經有11個月冇做嘢!」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

你敢爆,我敢獎! 立即Signal 63836568、WhatsApp 《蘋果》24小時爆相爆片熱線

或致電:63836568

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

追實城中突發大小事,即 like 蘋果【現場】FB!
BannerBanner