武漢肺炎|袁國勇視察友愛邨愛暉樓 籲全幢09室居民今晚撤離

更新時間 (HKT): 2021.04.09 19:47

直播重溫:YouTube

本港今日(9日)新增14宗個案,10宗初步陽性個案,衞生防護中心傳染病處主任張竹君今午在記者會上表示,其中兩名初步確診者居於屯門友愛邨愛暉樓09室,連同早前確診的70歲老婦(第11547號個案),累計已有3個9室單位有人染疫。因擔心愛暉樓內有垂直傳播,港大微生物學系講座教授袁國勇、多名專家、環保署、建築署及房屋署代表於傍晚6時左右到場視察。

袁國勇在愛暉樓視察兩小時,至晚上7時半離開,他表示愛暉樓樓齡有40年,污水渠及氣喉均在單位內,今日曾到相關單位及天台進行視察,亦與屋主作了解,其中2109室的戶主透露曾在家中聞到廁所的氣味。根據流行病學調查,2309室的住戶最先發病,之後樓下的2209室及2109室相繼有人染疫,可能出現垂直傳播。

他又指,2209室與2109室的通氣喉曾被切割,而2109室最近亦已進行修復,將喉管駁好,至於2209室的戶主於廚房安裝兩把抽氣扇,亦將廚房與廁所之間的牆壁鑿了一個洞,「只要廚房開咗兩把抽氣扇,咁強嘅負壓,係會令到廁所嗰邊嘅負壓都好犀利,只要啲喉管有好細好細嘅罅,就算冇嘢滲出黎都好,佢都可能會將渠裏面嘅病毒抽出黎」。

袁國勇表示,2109室的戶主雖將喉管駁回,但家中仍聞到廁所的氣味,所以相信病毒是透過喉管傳播,呼籲全幢09室居民今晚撤離,以免病毒經喉管傳播,直至渠務可以消毒所有單位,以及再檢查所有喉管是否有其他未發現的問題。

現場有記者表示,當區區議員曾透露房署曾於2月進行檢查,當時報告指喉管並無問題,袁承認涉事單位的喉管並無問題,而且非常新淨,但樓宇樓齡超過40年,從未試過大裝修更換喉管,不排除喉管有微小的隙罅,「好細嘅隙真係有可能睇唔到,當廚房安裝兩把抽氣扇,風力咁強力,係一啲特別環境因素,兩把抽氣扇同時開動,平時無事都好,都有可能抽到啲嘢出嚟」,呼籲居民開啟抽氣扇時,不要將門關上,盡量保持空氣流通,亦不要安裝多把抽氣扇及鑿穿牆壁。

有居民今午外出回家始知再有居民初步確診,但坦言「唔擔心得咁多」,居於21樓的陳太指大廈的衞生尚可,家中的喉管亦未有異味滲出,早前已加強消毒家居,但不會因此不外出,仍會如期相約親人明天拜山,「幾日都唔見,閂晒門窗都唔洗驚啦,而且又去咗醫院洗乜驚」。她又指自己昨日已完成檢測,結果呈陰性,所以放下心頭大石,認為屋苑內再有2人確診,應該不需要全幢撤離,「無理由要我撤離呀嘛,我住佢樓下咋嘛,又唔係住佢隔離」。

不過,有居於19樓的居民指自己雖不是住在09室,但由於同一座向,遂回家後會作徹底清潔,「返屋企由頭洗到落腳呀,不過無理由話擔心就要搬…可以搬去邊呀講真」。

張竹君指早前確診的7旬婦居於友愛邨愛暉樓09室,其後該大廈的居民需進行強檢,暫收到兩個個案屬09單位,屬七旬婦個案連續單位對落兩層。

其中一名66歲男子於本月1日開始流鼻水,於4月8日進行強檢後呈陽性,據知他鮮有出門,閒時會到屯門公園散步,4月4日曾與家人到鑽石山拜山掃墓。另外,初步確診的6歲男童與家人同住,最後一日於3月22日上學,4月2日開始流鼻水,其間曾到兆安苑定基閣補習,其補習老師及同學需進行檢查,但該幢大廈毋須進行強檢。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

你敢爆,我敢獎! 立即Signal 63836568、WhatsApp 《蘋果》24小時爆相爆片熱線

或致電:63836568

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

追實城中突發大小事,即 like 蘋果【現場】FB!
BannerBanner