撐阿布泰|市民爆買支持:好想講粗口鬧政府海關

更新時間 (HKT): 2021.04.09 17:15

海關昨日(9日)因懷疑「阿布泰」未有按消費品安全條例貼上足夠標籤,動員過百名關員到「阿布泰」全港26間門市及倉庫撿走市值近百萬貨品,並拘捕公司相關負責職員。《蘋果》今早到「阿布泰」分店視察,暫未見有「逼爆」情況,但有不少客人都特意到來支持「阿布泰」,更認為海關昨日的行動屬針對性執法,「好想講粗口罵呢個政府、呢個海關。」有市民更帶同《蘋果日報》到阿布泰購物支持,認為海關小題大做。

《蘋果》今早到「阿布泰」位於荷里活廣場的分店視察,該店於9時開門後一直都有客人前來購物,收銀台持續有人排隊付款,惟未見出現「逼爆」情況。店內的貨品都有貼上標籤,記者曾向店員詢問有甚麼貨品因昨日海關的行動而受到影響、暫時未能上架,店員回應着記者向公關查詢。

李小姐特意到「阿布泰」分店購物支持,她認為海關針對性執法,「香港咁多間都有賣泰國嘢,你偏偏唔捉,係要捉呢間,我覺得係純粹政治因素囉。」她表示,其他商店都有類似的標籤問題,海關昨日搜店之舉「有少少真係做大咗俾人睇咁樣嘅感覺」。她今日花了約700元購買凍肉和腳貼等貨品支持「阿布泰」,當中最特別的為一支貼有「香港加油」的酒。

「好離譜,好想講粗口罵呢個政府、呢個海關。」一名自稱「阿布泰」支持者的女士指,海關昨日的行動故意針對「阿布泰」,「大把(商店)漏貼(標籤)啦,你唔好玩啦呢個死政府」。每日都會逛「阿布泰」的她表示,漏貼標籤對購買產品未有任何影響,因消費者可自行上網搜尋產品資料,更指另一連鎖雜貨店亦同樣有漏貼標籤的問題。

熟客陳女士表示,今早花了約1,200元購物支持「阿布泰」,大部份是日用品和食物,惟未能買到一款含薑洗頭水,「店員話可能就係俾佢收咗嘅嗰批貨,但係就話遲啲都會入返貨。」她指平時購物甚少留意貨品上的標籤,「通常買食嘢就留意食用日期,買其他就好少留意。」她同樣認為海關選擇性執法,「好似有少少針對性咁囉,其他舖頭又唔去查嘅點解?我覺得唔係淨係佢哋有啲特別嘅問題咁樣囉。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

你敢爆,我敢獎! 立即Signal 63836568、WhatsApp 《蘋果》24小時爆相爆片熱線

或致電:63836568

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

追實城中突發大小事,即 like 蘋果【現場】FB!
BannerBanner