撐阿布泰|市民續排長龍「懲罰」 哽咽寄語「幫吓黃店微不足道 希望佢哋加油」 

更新時間 (HKT): 2021.04.10 15:57

海關前日(8日)因懷疑「阿布泰」未有按消費品安全條例貼上足夠標籤,動員過百名關員到「阿布泰」全港26間門市及倉庫撿走近萬件貨品,並拘捕公司男董事,事件引起全城熱話。

不少市民認為海關此舉針對性執法,對阿布泰不公,不惜以實際行動力撐,湧到各分店「大懲罰」阿布泰。昨日阿布泰各分店其門如市,今日亦不遑多讓,市民熱情未減。其中荃灣眾安街千色匯的分店,接近中午,分店外有逾百人排隊等候付款,長龍近30米,其中梁小姐表示今日專程過來支持:「噚日要湊小朋友冇嚟,今日屋企人幫手湊,特登過來,都知道多人,其實已比想象中少,預咗排兩、三個鐘。」

她說海關執法一定有針對性,「之前買嘢,好多都冇呢啲(標籤),睇返報道,海關近幾年只拉過幾間舖,但今次忽然咁大班人做,一定係選擇性執法,其實講真,依家已經冇集會,冇遊行,(哽咽說)我哋普通市民剩係可以幫吓黃店係微不足道嘅事,都知道班員工呢幾日都辛苦,希望佢哋加油,香港人加油!」

她又說「普通市民冇嘢可以做到,自己想走,但冇能力走到,冇嘢做到,惟有見到邊度告急,就去幫吓手,冇辦法。」

譚先生亦是今日專程由東九龍坐巴士到荃灣支持阿布泰,他坦言排隊排了個幾鐘,「我唔覺浪費時間,一路排仲一路買,呢個係我立場。」他指一直有幫襯阿布泰,對於海關選擇性執法,他直言「我建議海關關長撼頭埋牆死,係咁簡單,市民用真金白銀話畀你聽佢啲貨係冇事!」(老闆都受到壓力?)「有啲嘢放喺心,唔使解釋,早兩天我亦有到沙嶺公墓掃墓,根本香港人唔係為錢才出來,係自費出汗也願意做,係我哋嘅決定 ,唔計較代價。」他說很多事不需要解釋太多,最實際是行出來,「願意等、 願意流汗、 願意付出已經是最大的證明。」

沙田分店半百市民排隊支持 市民直斥海關「低能」故意打壓黃店

至於阿布泰位於沙田中心的分店,今天亦見人龍,記者目測現場有近50人排隊付款。不少市民雖只光顧店舖數次,仍不恥海關的行動,他們以實際行動支持阿布泰以表達對事件的不滿。

顧客黃先生過去曾光顧阿布泰數次,由於昨天金鐘分店排隊時間過長,故今特意來沙田分店購物。黃先生直斥海關「低能」,更指傳媒有報道其他店舖亦有漏貼標籤的情況,他質疑海關不嚴正執法,認為當局故意打壓黃店,對阿布泰感到不公。

對於海關指控店舖未有貼足安全標籤,市民文先生認為這種情況是「common(普遍)」的,更指香港任何一間店舖都有這種情況,是次當局的行動未免太大規模。文先生更說:「呢度係好嘢嚟,貨真價實,我哋先嚟幫襯呀。」另一市民鄧先生路過店舖,遂購買泰啤及薯片,對於昨日一事他未有多言,但他指:「我點睇件事?咪嚟幫襯佢囉!」

身穿印有「信仰」黑衣的劉先生偕女友人到來購物,他表示現在已購逾4百元貨物,「買零食,咩都買。仲未買完,睇緊」,他同樣認為海關執法人員的動機昭然若揭,故今天特意「懲罰」阿布泰。另一顧客鄭女士正在「血拼」,她直言:「一個字『撐』。佢哋(海關)玩針對,玩打壓,我哋就會越幫襯。」

至於大埔超級城分店則有近百人排隊,市民需在門外排隊,職員亦需要進行人流管制,分批讓市民入店購物。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

你敢爆,我敢獎! 立即Signal 63836568、WhatsApp 《蘋果》24小時爆相爆片熱線

或致電:63836568

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

追實城中突發大小事,即 like 蘋果【現場】FB!
BannerBanner