又拍片|掌摑30巴兼腳踢 天水圍跪地少女遭朋友欺凌 網民:真係壞過凱婷

更新時間 (HKT): 2021.05.05 16:10

【17:30更新】警方拘捕兩名分別13歲及14歲女童,涉嫌「襲擊致造成實際身體傷害」。

-----------------------------

天水圍發生童黨欺凌事件,一名十多歲少女,被另外兩名年齡相若少女多次掌摑及腳踢,另有一人圍觀,一人拍片。長逾6分鐘片段事後被放上社交網站,據熟知事件的讀者表示,當時為今年3月17日,位於天水圍天瑞邨附近。被欺凌者是「豆腐姐」,施襲者為「黑妹」及姓池的「藍精靈」,三人互相認識。警方表示正了解事件。

片段起首已見身穿黑色短袖上衣及黑色短褲的「黑妹」連摑「豆腐姐」4巴,身穿灰色連帽外套的「藍精靈」則從後腳踢,並出言指罵,「而家叫你揀啊,有得你揀咩,瞓X醒未啊!」但「豆腐姐」表現倔強未有退縮,反而直望「藍精靈」,逼得「藍精靈」說:「唔好咁嘅眼神望住我得唔得啊!唔好咁怨恨啊,我幫『散井』打㗎。」

「藍精靈」曾一度停手,指「我都唔知點啊,好X尷啊對X住你。」但未幾又再次出腳踢跌「豆腐姐」,又叫她跪低。此時「黑妹」說:「之前唔知邊個話叫『藍精靈』跪低叩頭嗰個呢。」「豆腐姐」反駁沒有,即被兩人再次掌摑,「唔好咁寸啦,你寸乜X嘢啊。」

「藍精靈」越摑越激動道:「你平時點樣講X我啊,你以為我唔知啊,乜X嘢叫做『散井』個妹啊!」「豆腐姐」雖再次反駁,但「藍精靈」大聲說:「屈?你而家惡X我呀?我打X你嗰個喎!」又指自己曾被「豆腐姐」施襲,「俾你紮過棍啦係咪啊,講真嗰次我冇篤你出嚟啦,你有冇諗過攬吓我啊」。

兩人其後再次對「豆腐姐」拳打腳踢,「豆腐姐」沒有還手,又出言「你打你打。」「藍精靈」即時回應,邊說邊掌摑腳踢,「唔好咁無辜啦,你永遠都覺得你自己冇錯,你有邊次同人嘈唔係你啱啊!有人幫你嘛,有人保你啊嘛,唔係好勁咩,『豆腐姐』喎。」

短短數分鐘,「豆腐姐」猶如人肉沙包,被掌摑面部及後腦最少30次,背、腹及腳被踢逾10次,但都一一承受。片段亦到此結束。據讀者表示,「藍精靈」口中的「散井」,有黑幫和勝和背景,主要活躍於元朗。片段引起大量網民留言,部份指不明白「豆腐姐」為何不還手,又指事件令人回想起「牛丸」及「凱婷」。

警方交代案情時表示,天水圍某中學的一名老師在欺凌片段流傳後向警方提供資料,指片段中的3名女生均是他所任教的中學的學生。根據該名老師提供的資料,警方聯絡到一名14歲中三學生,即事件中的受害人。她透露,片段是於3月中拍攝,欺凌事件的起因為私人糾紛。

今日下午,警方在元朗區拘捕一名13歲中二女學生,另有一名14歲中三女學生在家長陪同下到元朗警署自首,二人涉嫌「襲擊致造成實際身體傷害」。她們在警誡下承認自己是片中的施襲者,並指事件起因為私人糾紛。警方初步調查後,相信事件與黑社會無關。

網民留言節錄:

Andrea Wong:牛丸單嘢都未凍,又嚟一單。啲靚妹係咪咁鐘意申請去坐監。

Teddy Lau:佢哋將來大個咗睇返自己做嘅嘢!係多麼不堪同幼稚!

Linus Haha:想知成個故仔係點,豆腐姐出黎(嚟)講兩句,thx。

Kam Chuen Chan:而家啲後生女真係壞過凱婷。

Nick Man:真係生舊(嚿)叉燒都好過生依幾件番薯。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

你敢爆,我敢獎! 立即Signal 63836568、WhatsApp 《蘋果》24小時爆相爆片熱線

或致電:63836568

追實城中突發大小事,即 like 蘋果【現場】FB!
BannerBanner