疫情|荃威花園R座居民放「疫監」 撕林鄭感謝信表洩憤

更新時間 (HKT): 2021.05.09 18:18

直播重溫:果燃台YouTube

政府周五(7日)宣佈放寬「疫監」後,佐敦伯嘉士大廈和東涌映灣園的居民已在日前先後離開檢疫中心。荃灣荃威花園R座的居民,今日下午亦表示陸續離開竹篙灣檢疫中心。下午1時45分左右,有荃威花園R座的居民指,他們終於收到通知可於今日離開。上午居民收拾行李等候安排,然後逐一到空地向工作人員登記,再登上旅遊巴預備離開。

至下午近4時,荃威花園R座的居民陸續回到寓所,有行動不便的女子需要乘坐醫療輔助隊的專車回家,其間大廈保安亦在樓下等候,協助她將行李搬落車。兩小時後,再有旅遊巴抵達荃威花園,記者眼見落車的居民除了有長者外,另有一家大小扶老攜幼落車,他們拿着一袋二袋落車,部份人比較狼狽。其間有居民見到記者拍攝,於是拿出林鄭月娥署名的感謝信並撕掉,以表不滿。部分居民亦在臨下落車前在旅遊巴內拍手,慶祝結束5日隔離生活。

其中一名返回荃威花園的男子大呼自己並不是居民,僅在荃威花園R座一裝修中的單位擔任泥水工作,豈料被當局列為需隔離的人士,令他非常不滿,相信反映也沒有用,「我喺度做嘢㗎咋,俾佢捉咗去困咗幾日呀…我啲冇權冇勢打工仔,香港政府放毒入來,搵我受罪」。他指在隔離營內環境惡劣,膳食質素差,「我想自殺呀,太過殘忍啦」,被問到對林鄭月娥向隔離營內市民發出感謝信有何感覺,他反問要感謝甚麼,「你唔好同我講𠵱啲!」。他邊說邊帶着行李急步離開荃威花園 ,並認為自己「𠵱家安全咗,唔死得,好彩囉。」

住戶周先生同樣認為政府的安排十分之差,「好混亂,啲嘢食食到我個女肚屙咗幾次...佢叫我入院,呢啲咁嘅環境冇理由入院」,幸好他女兒昨晚的腹瀉問題已在今早好轉,不過當他要求職員提供方包時,對方竟要求他向社署申請」被問到收到林鄭的信件有何感受時,他反問記者:「粗口講得㗎?」他指出營後一家人都感到十分疲倦,只打算和女兒到附近餐廳吃飯,「唔搞咁多嘢啦,出到嚟都算。」

另一住戶古先生更憤怒得甫下旅遊巴,便在一眾記者的鏡頭前撕爛林鄭的感謝信,「呢份嘢唔應該存在啦...佢想用呢封信就想同我哋say sorry?走開啦。」他認為今次的隔離安排並不合理,許多居民亦因此手停口停,「我自己都係啱啱返新工,我而家都唔知我份工點。」他指這幾日的隔離生活十分難過,但慶幸自己有無限數據可以上網,「但其他人冇嗰啲點呀,好多獨居老人嗰啲邊個照顧呀?你舊年封咗關咪冇事!」

「無啦啦一個人確診,就要我哋成座人去隔離21日,我覺得好無辜囉!」一臉疲態的居民范女士和兩名女兒剛下旅遊巴,便不禁抱怨政府安排「玩嘢」,「改嚟改去呢啲人(高官),好似冇腦諗嘢咁樣」,更指自己收到林鄭的信件後想「撕爛佢!即刻!」

上周二(4日),荃灣荃威花園R座一名44歲菲傭確診帶有N501Y變種病毒,大廈住客隨即於翌日(5日)被送往隔離營。昨晚(8日),一名住在竹篙灣檢疫中心的荃威花園R座居民得知未有回家安排後,一度鼓譟,攜帶所有個人物品衝出房間,走到營房空地破口大罵。

政府在周五表示,現時因與變種病毒個案住同一幢大廈而要檢疫的人士,會先做一次檢測,在取得陰性結果後可以停止檢疫,但返回住處後,在第3日、7日、12日、19日仍要強制檢測,並要自行做醫學監察。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

你敢爆,我敢獎! 立即Signal 63836568、WhatsApp 《蘋果》24小時爆相爆片熱線

或致電:63836568

追實城中突發大小事,即 like 蘋果【現場】FB!
BannerBanner