疫情|康怡N2居民批政府逼「坐監」 唔係隔離營係集中營呀!

更新時間 (HKT): 2021.05.10 11:36

政府上周五(7日)放寬「疫監」後,一度入住隔離營的市民紛紛回家,包括昨日離營的太古康怡花園N2座、薄扶林豪峰,以及再之前的佐敦伯嘉士大廈和東涌映灣園。有N2座居民鬧爆當局安排,由入住、食物、營地設施,到離開的一刻,所有安排都有問題,「講到好緊急,但其實乜都安排唔到」。

N2座居民林先生,休息一晚後今早要返回工作崗位。回想數天的隔離期,他用「坐監」來形容。林先生一家四口,與妻子和兩名稚女(2歲、8歲)被安排到竹篙灣隔離營。因為女兒年幼,他們對衞生環境特別注意,自備床單、被鋪、風筒和食物。他直斥入隔離營的安排好差:「畀杯麵,如果我哋冇帶食物,點可以畀兩歲小朋友食杯麵呀?」其後才獲發飯盒,但數量次次不同,「一時3個、一時4個,有時下晝唔派,一派又派好多個。要追係可以嘅,但等囉!」

另外,他們入住的隔離營67座,所有房間都塞廁所。「要求換房嗎?9點聯絡,11點半都冇覆,結果下午先搞到」,他們搬到77座,該處大部份是薄扶林豪峰的居民,不料職員疑沒有更新資料,及至昨日離營,還以為67座的N2居民已全數上旅遊巴,林一家由下午1時等到4點半,追問下仍然只得一個字──等。他們最後逼上旅遊巴,才獲離開。

林說:「由第一日接待、安排、換房,到噚日走,全部都有問題。我明白市民係有責任去配合,但可以好啲囉,我唔係犯法呀!點解好似坐監咁,有啲要求都唔得?4日還可以,如果21日,真係唔知點。」

他又指,N2座居民要入隔離營,他是從新聞得知。「冇人同我哋講呀!冇人通知。」他們執妥行李,但一直未獲安排,「瞓住等囉,結果第二日10點先撤離。佢講到好緊急,但其實根本安排唔到;入去係咁、出嚟嗰刻又係咁」。

對於有離營的市民怒撕特首的感謝信,林先生亦對信件不以為然:「(感謝信)公關伎倆嚟啫,冇咩感覺,無論邊個做特首都好,都會做呢啲嘢。」

另一位居民莊先生指,從群組得知還有居民未回家,質疑安排失當;他同時批評隔離安排混亂,「退休人士就好啲啫,返工返學咁點呢?點解唔可以家居隔離?嗰度唔係隔離營,係集中營呀!」他表示有CCTV監視,見到有人擅自活動,職員馬上喝止趕回房間。

東區區議員魏志豪稱,昨日最後一批4人,於凌晨1時才返抵康怡花園,但其實還有近20名居民未離開隔離營,包括4名保安員和清潔工,有關方面指稱是漏了出營文件。

魏志豪批評政府消息不準確,「昨晚政府透過傳媒指,已全部獲安排離開檢疫中心,但映灣園及康怡分別最少一個單位及約20人未離開竹篙灣」,他要求衞生署發放準確資訊,並盡快安排該些住戶離營回家。

太古康怡花園N2座和薄扶林豪宅豪峰分別出現菲傭確診個案,初步顯示涉及變種病毒株。上周三(5日)兩幢大廈的居民要強制檢測,其後政府宣佈所有樓層單位住戶要撤離,分別涉及約230及30個單位,進行21天強制檢疫,翌日(6日)全部居民撤離,大部份人安排入住竹篙灣隔離營,小部份人到鯉魚門隔離營。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

你敢爆,我敢獎! 立即Signal 63836568、WhatsApp 《蘋果》24小時爆相爆片熱線

或致電:63836568

追實城中突發大小事,即 like 蘋果【現場】FB!
BannerBanner