旺角腦退化婦瞓街第10日 街坊苦勸婆婆接受協助

更新時間 (HKT): 2021.05.14 15:19

慘遭業主逼遷的蒙婆婆,今日第10日在旺角居住大廈外的街頭露宿,酷熱天氣下,幸婆婆身體狀況尚可,但始終「無瓦遮頭」,疲倦時只得坐在膠箱家當上「舂眼瞓」,以小食充飢。有街坊不忍見她受苦,上前勸她接受外界協助,她堅持婉拒好意:「多謝你關心,多謝你哋幫我,唔使呀」。

蒙婆婆連日在西洋菜南街捷利大廈樓下守候,一袋二袋家當放在路旁,她左眼角仍貼着紗布,間中拆開小食充飢,《蘋果》上前問候,她重複慨嘆意想不到被二房東逼遷,「唔會咁大膽咁囂張咁做,想唔到今次竟然有啲咁嘅事出現,好奇怪」、「囂張到不得了,蝦人都唔係咁樣蝦法⋯⋯我啲人冇權冇勢吖嘛,又冇錢,人哋唔怕你蝦你⋯⋯真係好火滾,欺人太甚!」

她連珠炮發批評二房東:「夾阿林鄭嚟整我,又講你香港法律幾好幾好,香港容許啲咁嘅人嚟整我,老實講我覺得好奇怪。」其間一名女街坊走近婆婆勸她如有人安排住宿應該前往,向她說「熱呀,熱到好緊要,你又冇得沖涼,真係好淒涼」,記者亦向她說很多人願意協助她,惟她僅說:「多謝你關心,多謝你哋幫我,唔使呀」。

蒙婆婆疑患輕度腦退化症,上周日(4日)業主收回板間房單位,她無處為家流落街頭至今。昨日救世軍護士到場替婆婆檢查心跳血壓、消毒洗傷口和換上左眼角的新紗布,油尖旺區區議員朱江瑋亦一直了解婆婆的情況,附近的食店老闆亦不時留意婆婆有否異樣。朱江瑋為婆婆準備好支援,曾與警方、社會福利署及其他社福機構商討跟進婆婆的方案,亦已通知廣華醫院,一旦婆婆健康惡化會隨時準備為其提供緊急醫療服務。朱同時期望市民能婆婆的行為多加包容。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

你敢爆,我敢獎! 立即Signal 63836568、WhatsApp 《蘋果》24小時爆相爆片熱線

或致電:63836568

追實城中突發大小事,即 like 蘋果【現場】FB!
BannerBanner