唔教五加一 - 左丁山

更新時間 (HKT): 2020.09.27 02:00

星期二晚到馬會食晚飯。只見中餐廳坐滿會員,張張枱都係四人一枱,有不少細路及年輕人㖭,應該大多數係一家四口共吃晚飯,餐飲界爭取到兩人一枱放寬至四人一枱,對生意係有好大幫助嘅,兩人世界即係規定兒女不能跟父母出街,父母咪索性留在家裏,不出外晚膳囉。

坐低不久,見到朋友夫婦及兒子三人坐在不遠處,兩人都是教師,走埋去傾兩句,笑問朋友P:「係唔係慶祝明天不用Zoom,回校上課?」朋友P答:「唔係,你知我係教歷史兼通識嘅,正一吃力不討好,我一夠資格提早退休,立即辦理,今個九月開始,唔使再教書,一身鬆晒!」可惜啲噃,未夠60歲就退休,以後做乜好?P太又係通識科老師,不過年紀細朋友P幾年,未退休住。P太話:「依家有梁振英鼓勵嘅舉報風氣,教通識科教到驚,討論時事,講解中國近代史,上個學年講解中美貿易戰,事先校長都叫我小心處理,唔好放言高論,以免有學生投訴,嘈到去楊潤雄嗰度。」

唉,英基與若干國際學校都發勸喻,叫老師在班上不可發表自己嘅政治見解咯,本地學校更受教育局注視,教師上堂點敢放言高論呀!朋友P話:「廣東話俗語有輸波姓賴一句,現在教書碰到不少家長唔高興就姓屈,對老師屈得就屈,我聽到一間小學老師教小學生數手指計四加一、五加一、六加一等如幾,居然有人講五加一係禁忌,你話係唔係好荒謬?」

左丁山聽見幾乎噴出口內壽眉茶,香港學校以後有自律,自我審查,皆因教育局有意無意咁改咗姓屈,香港學生還講甚麼獨立思考、言論自由?竟然咁驚青,不如廢咗科通識教育啦,留低呢科,只會向藍絲建制派提供藉口,將青少年之爭取民主運動抹黑為教協黃師荼毒白紙一片嘅中學生。藍絲其實姓賴兼姓屈,輸波不止賴地硬,更加屈教協老師教壞人。朋友P話:「我兩公婆係教協會員,楊潤雄蔡若蓮兩人不妨認真深入研究吓,點解教聯教評及同類嘅建制教師組織,多年來都冇法子吸納更多教師做會員,讓教協日益壯大!」使乜研究吖,楊蔡兩位隨時可以搵到姓賴姓屈嘅理由,當今政府邊會承認香港學生傾向爭取民主㗎!

果然好玩 籽在四方,即like「果籽」FB專頁!
BannerBanner