航權算盤政治化 - 左丁山

更新時間 (HKT): 2020.10.29 02:00
國泰航空fb圖片

國泰為了重組架構,將港龍航空執笠,自動放棄46條航線,其中22條係飛內地嘅,照計航空公司最珍貴資產係航權,冇航權,買飛機嚟做乜?左丁山唔識嘢,對此感到疑惑,問吓朋友,朋友A寫短訊解畫:「國泰相信係有下一步棋嘅:政府已洗濕個頭,大力支持國泰,國泰必會以國泰名義再申請攞番呢46條航線,政府已是國泰最大持份者,冇理由唔益佢!」

諗落好似係,政府已派咗兩人入國泰董事局做顧問(即唐家成與袁國強),國泰早前唔申請第二輪保就業計劃,已露風聲11月會大裁員,咁重大之重組計劃,在董事局開會時,政府顧問雖無投票權,但如果兩人唔同意,國泰邊夠膽推行呀?袁國強係前律政司,熟悉特區法律及政治,唐家成係前畢馬威及證監會主席,對財政安排係高手中之高手,邊會唔睇清楚國泰之重組涉及多少金錢及利益損失?封咗港龍而失去46條航線,其中利弊,必然已想清楚。按道理,政府應該會有默契地將港龍航權分番畀重組後之國泰航空嘅,何況香港還沒有其他航空公司與國泰爭航權!

點知會殺出一個程咬金,就係黃楚標!佢嘅深圳東海集團有一間東海航空,以深圳為基地,係內地民航總局監管嘅航空企業。但黃楚標最近籌備成立一間香港註冊嘅大灣區航空公司,以香港為基地,受香港民航處監管,獨立於深圳獨立航空。既有此重大利益關係,當國泰一宣布港龍停業,黃楚標立即接受明報(10月23日)訪問,聲稱一定盡能力申請22條內地航權,希望政府公開透明,不要「私相授受」。運航局嘅回應係大打官腔,重申「會按既定指引處理申請,考慮包括鼓勵良性競爭,是否對香港作為國際航空樞紐地位有利,香港航空業整體發展等利益因素,而每宗申請處理時間不能一概而論。」人大常委譚耀宗,也開口幫忙,稱政府可待大灣區航空取得許可證後才展開航權申請,甚至要良性競爭,會將航權傾向批給新成立的大灣區航空……睇嚟一場大戲即將上演,國泰董事局編好之重組劇本,未必會咁順利展開,目前黨媒及藍絲對國泰困境幸災樂禍,直言「抵你死!」,相信好快就有不少言論支持大灣區航空,製造民意,林鄭再次發現身在夾縫中,不知如何是好,益番國泰吖,還是向深圳勢力低頭呢?

果然好玩 籽在四方,即like「果籽」FB專頁!
BannerBanner