葉劉獻計 - 左丁山

更新時間 (HKT): 2021.01.16 02:00
《蘋果日報》截圖

在銅鑼灣希雲街「旭」與公子L享用美味鐵板燒消愁之後,講話大聲咗一啲,竟然因此結識咗一位新亞師弟,退休私人銀行家T,可謂機緣巧合,公子L與師弟也都係1979年大學畢業嘅,呢一輩畢業生生得逢時,在香港搵食幾易,1980年代末與1990年代初時候移民,攞完外國護照再回來香港搵銀。好彩沒有遇上霉運嘅,現在已可安享退休生活,公子L與師弟T正是此類型。左丁山對佢兩位講,好彩你兩位老早移民成功,回港再貢獻香港社會,走遲咗要揸住BNO移民英國嘅話,會畀行政會議成員,立法會資深議員,前保安局局長,前入境處處長葉劉淑儀女士搞到你哋失去香港居留權也!公子L話葉劉係咁意講吓嘅啫,大概只係放氣球測試香港人反應啫。

做過入境處,做過保安局,葉劉其實好清楚居留權及香港人移民嘅數據,如果佢係得到北京垂青,指派佢放風,以佢資歷,算係最佳人選,但如果佢事先冇同北京摸底,自動獻計,正是體會領導苦心,有望再次在2021年下半年宣布再度參選特首。你估係邊樣呢?葉劉把口已經承認冇北京授意,限制BNO移民人士國籍係佢分析之後嘅意見。英國在2021年1月31日開始,本港持BNO者可以申請簽證移民英國,葉劉此時此刻建議中央嚴格執行「中國國籍法」禁止雙重國籍,持外國籍的香港人需要放棄香港的居留權與投票權,一定起碼有幾十萬BNO持有人怨聲罵聲不絕。

葉劉言論驚人,又語焉不詳,因為香港估計有三十萬加拿大人,又有至少三十萬澳紐美人,大部分係本港永久居民,幾乎所有大富豪下兩代,建制派商人皆持有外國護照,陳啟宗係表表者,特區政府唔會逼佢地靠邊站啩?二選一呀?葉劉之後澄清,佢係想有一個「截止日期Cut off date」,(左丁山舉例:2021年1月31日),該日子後獲取外國籍的人,會被視為放棄中國籍,以後返香港要申請工作簽證,講得白啲,就是留島不留人,你用BNO簽證入籍英國,以後唔駛返嚟嘞。如果真有此例,不少高官在外國讀書等入籍嘅子女將來亦會喪失香港居留權,林鄭丈夫兒子早已有英國護照,則不受限制。葉劉呢條計,勁過青竹蛇兒口,黃蜂尾後針,下次有立法會議員選舉嘅話,港島區BNO持有人及中產投票前不妨喚起回憶。

果然好玩 籽在四方,即like「果籽」FB專頁!
BannerBanner