佛隱隱於市 - 陳也

更新時間 (HKT): 2021.02.11 02:00

傑斯再被拉,控罪指意圖引起憎恨或藐視港府或激起香港居民之間的不滿與離叛……一句到位,乞人憎,係唔講得。解籤的佛隱居士直頭搵命博,法官假如確認唔到,居士是黃大仙使徒,或者唔肯定支籤是不是引起憎恨的殺傷性工具,亦不明白籤文的解讀比例,敵意定係惡意呢?鑑於案情嚴重,引致全港善信嬲嬲豬,入肉㗎,意思即係入獄,牆了。(此牆是真高牆,唔係內地Clubhouse用家忽然被禁「無房開」後的怨言。)

大聲叫鄭市長食屎的阿叔,大鬧「一個癲婆累七百萬香港人」的街坊,有幾離叛?以天井渠位垂直播毒來量度,屋企四面牆保護唔到你。唔撤離即當做離叛。咪以為離叛離開你好遠,當見到英皇道街坊竟然成晚滾攪之下仍豎大拇指與民 ×聯議員合照大讚條手帶好靚,你就知道鐵鏈纏腰並非用來封毒而係針對離叛對象。封樓檢到四宗確診,幫張建宗開齋,街坊被提名諾貝爾醫學獎都得呀!有鬼佬在「中國日報」投稿,指香港唯一值得拎諾貝爾和平獎的只有差佬,安心愛撩喉兼預先表態接受肛檢的街坊,舉腳贊成!聯署提名,這次會比簽名撐国安法那三百萬市民+王冬胜翻兩倍!區會投票那160萬選民與浩蕩的200萬+,似水牛年,作叛不離,心存一篝火,佛隱隱於市。

果然好玩 籽在四方,即like「果籽」FB專頁!
BannerBanner