訪問打復必泰的藍絲 - 馮睎乾

更新時間 (HKT): 2021.03.19 02:00

新聞說有個31歲男子,接種復必泰後失知覺,馬上分享給愛國藍絲K:「嗱,你睇打復必泰幾危險吖,打咗科興未?」誰知K秒回一句:「佢冇知覺之嘛,有七個人打科興冇命喎!」

我說:「你唔可以咁講㗎吓。科興疫苗係祖國皇恩浩蕩賜畀香港救苦救難大禮物,專家話冇證據顯示同嗰七個人嘅死有關,你咁講可能犯咗『煽動仇恨特區同中央政府』,今日唔畀人拉,唔代表聽日唔畀人拉。」K說:「照你咁講,有證據顯示個男人冇知覺,係同復必泰有關咩?」

我無語,頓一頓說:「你最近諗嘢好偏激,係咪受到別有用心嘅所謂媒體誤導?你睇邊份報紙?」K說:「我咩報紙都睇。前兩日東方報道,有中港司機打科興後面癱,後悔信錯政府;今日蘋果就報道,智利打完科興,確診人數不跌反升,英美打其他疫苗,例如BioNTech嗰啲,確診就暴跌。數字唔會呃人。」

一向致力唱好科興的我,馬上反唇相稽:「講到復必泰咁好,唔見你打?」誰知K說:「我打咗喇!唔通我練如來神掌又話你聽咩?」我尚未來得及反應,K已忍不住滔滔發表偉論:「等我袋錢落你個袋啦,知唔知點解大陸同澳門都建議60歲以上唔好打科興,偏偏淨係香港政府先由得啲老人去打?」我說:「美心太子女放棄年輕人,或者林鄭放棄老年人呢。」

藍絲K說:「錯喇,都叫你咪成日群埋班黃絲,搞到個人蠢晒!係因為大陸同澳門嘅同胞,一般比香港人更加信國貨呀。」「咩話?」K解釋:「大陸澳門就算老人唔打,一樣大把人信阿爺,可以去到貨。但香港唔係。香港邊啲人最信國家?咪老人囉!特區政府有跑數壓力,明知大多數後生同中年唔打科興,如果連老人都唔畀打,科興咪閻羅王嫁女?」

藍絲K補充:「靜靜雞提你一句:𠵱家唔打復必泰,第日會唔會因為某啲理由,剩返科興畀你呢?早打早享受,唔打唔知有咩受。為咗跑數,我點知政府去到幾盡。仲有,復必泰係上海復星代理,都係國貨,所以我打復必泰一樣愛國。」利申:我完全不同意這藍絲的陰謀論,我信政府一片好心。

電郵:philomusus@gmail.com

果然好玩 籽在四方,即like「果籽」FB專頁!
BannerBanner