名女校學生 - 左丁山

更新時間 (HKT): 2021.03.29 02:00
香港大學fb圖片

在報紙教育廣告版,見到幾間著名女校小學,小女拔、小瑪利諾、小德望都要聘請各科教師,瑪利諾還要聘請副校長。記得呢類名校嘅教師通常冇乜流失,好穩定嘅,因為教名校有啲prestige,在朋友圈子幾有face,唔通在人工水平差不多之下,會辭職去教另一間屋邨小學咩?在中環街頭碰到一位出身著名修女學校嘅基金經理W小姐,順口問吓佢母校點解要請教師?W小姐話:「一字咁淺,移民囉。我問過一位校友,佢個女在母校讀小三,佢話學生父母移民,插班學額增加,老師也移民,出現各科空缺呀。」此乃1980年代移民潮翻版,人各有志,冇得好講。問W小姐會唔會移民,佢瞪大隻眼:「我現在薪高糧準,移民做乜呀!我隨時可以去英國,但咁嘅時勢,睇多兩三年先啦!除非連批評國企管理無能都算觸犯國安法,我唔會走住嘅!」

不過W小姐對佢嘅同輩、師姐(即著名修女學校畢業生)而又同時做緊高官嘅就相當不滿,話佢地在學校時太聽修女話了,做乖女,勤力讀書兼緊跟考試範圍,於是個個成績好,品學兼優,排隊入港大,跟住考AO成功,逐步晉升為首長級官員甚至問責官員,一世無憂。咁唔好咩?乖女叻女年年考第一,家長歡喜還來不及呀!W小姐話:「我就係修女最唔鍾意嘅學生。修女久唔久要我地量度校服裙夠唔夠長,要跪低還要裙腳冚到膝頭以下,先至算合規。我就時時犯規!咪入唔到港大,入唔到政府做官囉!」

嘩嘩嘩,入咗股票行,做基金投資經理咪仲正,使乜恨考唔到AO、EO啫!正因為W小姐自小有不聽權威訓示嘅性格,依家選擇股票投資,不做羊群跟風,久唔久就搵到一隻升到爆燈嘅股票。W小姐慨嘆佢啲師姐讀書時聽修女話,初做AO,聽英國人上司話,97後冇人指揮,領導能力立即現形,到了2021,開心咯!聽晒北京話,唔使傷腦筋,而薪水不減,唯唯諾諾又到月尾在屋企數銀紙(月薪),真爽!

叫W小姐數幾個師姐名字聽吓,一聽就明白W小姐為乜有怨氣,嗰幾位高官,又真係難頂啲嘅。

果然好玩 籽在四方,即like「果籽」FB專頁!
BannerBanner