疫苗護照難產 - 左丁山

更新時間 (HKT): 2021.04.06 02:00
路透社

環球疫情未完,歐洲疫情反覆之際,WHO指責歐盟之接種疫苗行動搞到一團糟。但為了恢復國際旅行,挽救全球旅遊業,西方國家已熱切討論推行疫苗護照(Vaccine Passport),凡接種有效疫苗者,可獲發證書,可登機旅行,但當然係只可以往來承認疫苗護照的國家,例如歐盟國家可以互相承認,東盟國家可以互相承認,澳洲紐西蘭互相承認等等,香港也可以與新加坡泰國來一個互相承認。

只不過,各國要首先承認那一隻疫苗有效。市場上已有輝瑞/BioNtech、牛津阿斯利康、莫德納、強生、中國國藥(Sinopharm)、科興Sinovac、俄羅斯衞星五號,起碼有七款,BBC估計全世界最多國家使用輝瑞或牛津,但中國承唔承認呢?

W教授經常往來內地,研究一番之後,全家二十幾口由做醫生嘅細佬注射科興疫苗,包括九十幾歲嘅老人家,全部感覺良好,但既然巴基斯坦總統接種國藥之後便確診,注射科興第二針特別重要,W教授話應該冇問題,因為科興疫苗以傳統方法製造,成份主要係水,對人體影響應該係最少。

賓架G研究一輪之後,認為自己平時要到歐美公幹,他日若有疫苗護照,輝瑞必獲承認,於是打咗「復必泰」;但鐘錶L就好頭痛,因為佢有工廠在寶安,自己年年去歐洲參加鐘錶珠寶展覽,若打科興,歐洲未必承認,去打復必泰,中國未必承認,怎麼辦?唔通兩隻都打,共打四次?左丁山以此問教授W,佢話打齊兩隻不同疫苗,未有科學研究,還是慎重啲比較好,即係話要二揀一,令鐘錶L左右為難。如此問題,其實應是世界衞生組織與各科學大國如美英中德法俄等專家協調,達成共識,各國政府先至容易發出疫苗護照,但世衞在疫情初起時,威信飽受懷疑,已經變成跛腳鴨,靠世衞發指引,大概無可能,國際旅遊業只能空焦急。2020年本應有歐洲國家盃、東京奧運舉行,旅遊界老早部署賺一筆,誰知被迫延期今年舉行,情況依然悲觀,疫苗護照未能及時推出,兩大比賽勢將閉門舉行,旅遊業與主辦國見財化水,日本尤其難堪,只能怪責世衞及各國抗疫失敗了。

果然好玩 籽在四方,即like「果籽」FB專頁!
BannerBanner