知識份子唔易做 - 陶傑

更新時間 (HKT): 2021.04.07 02:00

香港KOL出售物業,呎價兩萬六千,套現四千三百八十萬赴加,全城哄動。

我討厭政治,唯由房地產經濟市場看來,證明香港樓市後勁凌厲,經濟前景大好。拜登去美國匹茲堡宣佈注資兩萬億美金經濟紓困,還宣布企業利得稅由百分之二十一加至百分之二十八,此舉有利於美國資本外流,若是生產企業,必定大舉搬回中國。加上疫苗全球初見成效,世界經濟見曙光,各種利好消息,必定對香港樓市有繼續刺激作用。

太古城呎價二萬一,將軍澳二萬。KOL那個公寓,據說還有無敵海景。此產業一脫手,據說同一大廈類似單位叫價,直攀五千萬。

地產經紀朋友C君即刻要求通電話,說:「我現在終於明白,點解陶生你一年來,雖然大力支持川普連任,但同時又話渴望拜登贏。果然拜登上咗台,其幕後金主華爾街、美國大企業包括Walmart等大開香檳。美國生產線唔會再離開中國市場搬返美國,間接刺激全球包括美國的貧富懸殊更為對立,亦即香港的房地產經濟形成的貧富懸殊更厲害。陶生你身為KOL,一定手持香港多個物業,難得你又係知識份子,先天下之憂而憂,覺得西方文明不受左膠侵害,重要過你手頭持貨升價。你口不對心,高瞻遠矚,真係令我好佩服。連阿劉X X層樓都咁勁,你今次發達啦。」

我一聽,如此打聽私隱,覺得來意不善,一定是想游說我幫襯他一樣賣樓套現。我乾咳一聲,正色說:「你咁睇得起我?話俾你聽其實我喺香港冇樓㗎。」說到這裏,對方冷笑。我不理會,繼續說:「不過,在這個亂世,知識份子真係唔易做。我當初反拜登,當然係預知佢一上台,啲美國廠商點會搬返美國呢?香港的美國資本點捨得走呢?你看港元與美金匯率一直勾到實,反而阿特朗普如果做多一任,會繼續癲落去。拜登上台只會學奧巴馬量化寬鬆印銀紙,中國又印銀紙,現鈔繼續貶值,各大戰略城市的磚頭又點會唔升?香港更改選舉制度,中美政治反枱,中國要求面子,中國人係一定掂的,之後中國點會俾香港的經濟崩潰?所以拜登贏,美國啲窮鬼日子更艱難:邊境仲放多十萬非法移民入美國,搞到集中營唔夠床位一鑊泡。睇見咁嘅場面,冇錯,我真係戥全香港房地產業主開心。」

因此除了劉大K套現回加拿大退休做豪華寓公,要多謝拜登,多謝美國白左,學術理論多多都沒有用,生逢亂世,有物業最實際,不論紐約倫敦巴黎,請問隔籬的左丁山大哥,你話係唔係?

果然好玩 籽在四方,即like「果籽」FB專頁!
BannerBanner