恢復委任制 - 左丁山

更新時間 (HKT): 2021.04.07 02:00
資料圖片

碌曾傳來阿寬之「發夢」文章,文章內容係有人發夢對話,搬龍門,換球證,改球例,再有場外裁判審查客隊球員出場資格……原載阿寬之明報專欄,一路睇一路笑,但笑死就會苦口苦面,唉聲嘆氣!碌曾讚阿寬創意無窮,當然冇講錯,但左丁山不禁為呢位新亞新聞系師弟擔心,寫得咁諷刺,好唔識時務喎,何況阿寬係電影人、著名編劇家、導演,佢啲同行靠邊度搵食呀?人人收晒聲啦,更有開聲制裁A牌球鞋、制裁B牌衣物,表忠唯恐不快,不惜違反代言人合約,冒犯國際著名品牌。何物阿寬,靠電影吃飯;竟然不吃那一套?

另一位新亞新聞系師弟區家麟唔想發夢,明刀明槍,在蘋果專欄痛批特區政府花納稅人金錢推銷發夢,香港目前就上演一場荒謬劇,大倒退叫做改善,唔駛選民投票就做立法會議員叫做擴大民主,完全消滅反對聲音叫做穩定。想參選,要由一個資格審查委員會批准,審查委員會委員係乜水?由特區政府委任(當然事先聽咗中央指示);選民選出來之區議員不能加入選委會,完全由政府委任之分區委員會委員及完全無人理會嘅分區滅罪、防火委員會委員就可以加入選委會,如果讀書時唔識解讀成語「指鹿為馬」,「掩耳盜鈴」,今天政治現實清楚解釋話晒畀你聽。

既然已經大石砸死蟹,還要花錢在周圍派廣告,輸送利益畀自己人傳媒,美其名曰向市民解說,高官又幾唔怕面紅。其實連日所見,大家都開始不談政治,對甚麼完善漠不關心,你哋鍾意搞乜咪搞乜囉,唔好逼人聽那位菲律賓肥媽賣廣告就得啦!今年年尾如有立法會分區直選,(十選區,共二十席,取雙議席單票制,廢除比例代表制),會唔會有選民排隊投票呢?到時可能只係會見到投票站街頭塞滿老人等旅遊巴都未定。

恢復委任制,參考1960、1970年代方式,算唔算倒退,還可辯論,但實質上恢復委任制叫做完善選舉制度,真係好難啃。公社發展科老師上堂係咁講,學生默不作聲係咁聽,考試以黨媒文章為模範答案,齊齊一百分,皆大歡喜。如此教育,保證以後唔會產生阿寬區家麟呢類人才,忠誠的庸才就滿街都係!

果然好玩 籽在四方,即like「果籽」FB專頁!
BannerBanner