移民漸入高潮 - 左丁山

更新時間 (HKT): 2021.04.16 02:00

上星期六寫咗一篇「為何各散東西」,講移民令中產階級好無奈,星期日在馬場碰到一位馬友,佢對左丁山講:「左生,你所講之移民動態,到處都有,我嘅鄰居通知我佢在暑假學期完畢後就移民英國,為下一代着想喎。」為下一代而移民,幾十年來都係咁講,但呢一次就真係冇花冇假。1997後出生之香港人,當然無緣攞BNO,但佢地嘅爸爸媽媽,一般係70後,80後就多數有BNO喎,英國政府諗得幾絕,有BNO之父母可以帶沒有BNO之子女一齊移民,用五加一計劃獲得居留權,呢一招有好大吸引力,啲年青中產父母幾難抗拒。現在又有新招,話允許有太空人,即BNO父親或母親可留港工作,其他家庭成員可過去英國先。有呢兩招組合拳,相信今年七月中以後會成移民高潮,國泰客機班班爆棚都似,唔該國泰航空高層預備增加航班嘞。

世界疫情冇大改善情況下,在家工作(work from home)未來有利移民安排,未必要做太空人。有朋友告知,佢個同學正為移民去澳洲,驚搵唔到工而焦慮。美國傳來好消息,呢位仁兄B係IT專才,申請美國本土一間公司一個職位,講明可以在家工作,仁兄B憑資歷力壓其他應徵者,獲得聘書,佢可以在香港或澳洲在家工作,於是高興咯,一家人移民澳洲,在家以美國時間工作,顛倒日夜都冇計咯。又有一位阿太陪女到英國讀書,公司叫佢唔好辭職,一於在倫敦以香港時間返工,支番香港薪水,公司成功挽留人才,阿太在倫敦咪在當地時間午夜十二點與香港公司連線工作囉,此乃全球化之具體表現。全球化已是不可抗拒之大潮流,香港學生未來要加入全球化社會,首先要學好英文,其次係多留意世界各地時事,唔駛掛住讀公社發展科。

星期日賽馬後在馬會吃晚飯,遇到一位中大師姐,佢話畢業幾十年之後,一班老同學已劃分藍黃兩堆,各自unfriend,令佢好傷感,佢講及幾位深藍校友ABC,左丁山亦認識。校友話:「ABC三位愈老愈藍,其中一位仲係天主教學校出身嘅天主教徒㖭!佢地三人各有子女,一聲唔出,移民走人,出發前幾日先至通知,搞到ABC紮紮跳。原來ABC嘅仔女聽阿爸講憶苦思甜歷史,聽到怕,靜靜雞搞移民,不再留港照顧老人家喎。」聽落又幾令人感嘆,啲藍絲父母多啲同仔女溝通啦!

果然好玩 籽在四方,即like「果籽」FB專頁!
BannerBanner