表態 - 左丁山

更新時間 (HKT): 2021.04.20 02:00

朋友S入廚請左丁山吃午飯,左丁山話咗好多聲唔好意思,因為本來想搵埋佢到ICC 101樓吃飯嘆海景嘅,結果反而係到佢屋企。不過多年朋友飯聚,不在乎美酒佳餚,最緊要係傾偈傾個不停,無所不談。朋友S話退休人士第一要保持健康,恆常運動;第二係緊記中國俗語,家有二千,每日二錢,全無生計,用得幾年;第三係時事紛亂,不要太認真,最好盡量不理會,不參與,以免傷心傷神傷身;第四,人老了,移民外地很難適應,若在外地不幸患上思「香」之痛,成日諗住「信美非吾土兮」,命都短幾年。至於兒女移民不再陪伴自己,則要睇開啲,兒孫自有兒孫福,自有他們的天地,退休父母要採取自由放任主義。

幾啱聽吖!退休了,年紀已最少有六十歲或六十五歲,以香港人平均壽命計,今年年過六十之人,隨時活到九十歲以上,即是退休金用得幾年,相等於30年,幾襟計。唔怪得朋友S話要念念不忘「家有二千,日用二錢」。退休金每受通脹侵蝕,當今存款利率低,債券利率低於通脹,本來好穩陣嘅滙豐股票派息竟會變零,令退休人士大失預算,唔怪得有位律師朋友退出合夥人之後,賣去賽西湖豪宅,搬入新界,此乃釋放港島區豪宅價值之方法,增加退休金之現金成份,作謹慎投資之用,此又是另外一個話題。

財政策劃還可以自己主動,如何省吃儉用或繼續維持生活方式不變,各師各法,與人無尤。但有啲事情係強加於市民身上嘅,如果你認真,你就輸了。朋友S勸告,人地講完善乜,完善物,由得佢地去完善啦!反正普通人講乜都冇用,以後就一於不理,政治凡事不參與,不參與就無從不合法,除非如曾智華在FB所講:「你可以做合法的事,你叫他人做合法的事就可能犯法!」

不參與會唔會將來都係「犯法」嘅呢?本來係幾違反常識之事,經不斷完善化之後,可能成為真事!不參與亦未必可自作主,近日見諸不少報紙嘅連篇廣告,你估全部係即時反應咩!當然係有組織嘅啦,簽名聯署人大多數係被組織嘅,不表個態何成體統!

食完飯告辭朋友S之後行落地鐵站遇到一位商界商會人士,多口問聲:「你地表咗態喎!」佢話:「可以唔表咩,仲要做生意㗎。」唔!搵食啫!

果然好玩 籽在四方,即like「果籽」FB專頁!
BannerBanner