騙徒滿街 - 左丁山

更新時間 (HKT): 2021.05.01 02:00
《蘋果日報》截圖

香港真係遍地黃金,電話騙案黨亂咁打電話都可以掘到金礦,網上交友有騙徒扮英國軍官滾富婆,又有騙徒扮純情少女呃退休寂寞老男人,似乎騙徒處處有,只要下定決心行騙,就可能有機會中寶,發達話咁易,好似最近嗰單山頂富婆被騙兩億五,直情係電影編劇都編唔出嘅劇情。逾九十歲老婦點解要收埋咁多銀行存款,而唔係一早分配予子女,留番一億半億做安家費,已經幾難使得晒啦,電話騙徒呢次係行運行到落腳趾尾。

最近又有新招數,律師W去陸羽飲茶之前,收到一個電話,指係衞生署打電話嚟,話佢曾經到過一個確診處所,要佢回電按一,按二,律師W一聽就知係假嘢,立即收線,左丁山聽完當作笑話,點知返到屋企,就知道四姨仔收到一個同類電話,係衞生署講普通話叫佢回電,四姨仔為之震騰騰,坐立不安,左丁山話畀佢聽,衞生署職員一來唔會打電話搵你,二來唔會講普通話,梗係假嘢,唔使理。點知另一位親戚話,你都講香港正在變質,警察部放棄英式步操,改用中國式步操咯,衞生署唔講廣東話,改用普通話都未必係fake news喎。左丁山正想反駁,手機響起,係外國211字頭,知道係假嘢,聽吓有乜新招數先,電話傳來聲音:「你有重要速遞文件,請按一字……」唓,舊招啫,即刻收線,然後固網電話又響,竟然係衞生署來電,廣東話講:「最後通知……」

假資訊騙錢層出不窮,警方唔知有冇理會到,或者警方忙於搵fake news,冇時間冇人力去追蹤真正立心行騙嘅匪徒。拉記者係比較易啲嘅,古語有云「秀才遇着兵,有理說不清」,但去拉真正騙徒呢?俗話又有講啫,道高一尺,魔高一丈,大家睇開啲啦,銀包係自己嘅,睇實啲至為重要!執法機關係好忙碌嘅,你懂的!

次日去到馬會飲茶,見到律師T夫婦與兒子及孫子四人坐低,點解唔見媳婦,要由兒子餵奶畀七個月大孫兒呢?律師T話:「堂食只限四人,新抱唔嚟得,況且佢做教師非常忙碌,星期六還要開工。」今天教師當然忙碌啦,教育局一紙通告,要教國安法,校長就面青,與副校長、科主任籌謀如何教,教乜嘢,以免被小人篤灰,真係頭都大。律師T話:「我地都係盡量不參與咯,睇住自己身體至為緊要。」係啫,佢個仔及個孫又如何,能不參與乎?

果然好玩 籽在四方,即like「果籽」FB專頁!
BannerBanner