余偉文的憂慮 - 左丁山

更新時間 (HKT): 2021.05.10 02:00
金管局總裁余偉文(資料圖片)

金管局總裁余偉文覺得香港人打針接種疫苗嘅比率偏低,擔心香港競爭力降低,左丁山綜合各方面報導,發覺余總裁主要有兩個理由:

(一)英國接種率係34.1%,美國35.2%,新加坡19.4%,香港8.3%,在四大國際金融中心紐倫港新之中,香港遠遠落後。

(二)紐倫港新恢復正常往來嘅話,疫苗接種率成為主要考慮因素;金融界職員如因香港沒能納入「旅行氣泡」,難自由出出入入香港嘅話,金融界可能會將市場業務遷往其他城市。

余總裁嘅憂慮,冇話唔啱,但金管局無權干涉特區政府之疫苗政策,在這方面,余總裁係人微言輕,佢不妨向上司陳茂波司長反映吓:特區政府點解無辦法谷針,點解市民對接種疫苗,興致冷淡。呢樣就真係深層次咯,政府即使推出ABCD餐嚟吸引餐飲界職員打針,但幾乎全部冷淡應對……左丁山到過不少食肆,間間都話只有興趣做B區(四人一枱,十點收工),費事煩,只有做宴會廳者例外。食肆老闆怕劃分四區夠麻煩,可以理解,但點解食肆職員不踴躍打針……幾難解釋!左丁山到過一間老字號,侍應話全部夥計一百人,只有七個打咗針,其中一個係佢自己。左丁山問:「點解你肯身先士卒?」侍應說:「我常常招呼富豪L,佢話如果我唔打針就唔好行近佢!」哦,明白啦,富豪L畀貼士係好疏爽嘅,原來要有「誘因」才可能「谷針」,特區政府提供甚麼誘因呢?似乎唔見有,ABCD係笑話,去新加坡旅行?冇幾多人有興趣。

其實余總裁除咗接種疫苗比率低之外,佢不妨諗下一連串問題:國安法之勾結外國勢力條文,收緊新聞自由(打壓香港電台蔡玉玲、利君雅為代表),收緊進出境條例(見劉進圖明報專欄:限制來港隨時可變限制離港,5月4日),中產大學程度人才傾向移民,令人才流失;香港體制日益內地化。

以上各種因素,都會令外資金融機構地區總部遷離香港,新加坡最得益。如果香港制度完善到上海模樣,外資不如搬去上海算啦,更加接近市場㖭!如此這般問題多多,金管局內研究人員不少,個個係精英,佢地有冇暢所欲言,本着自由思想,向余總裁提供研究結論呢?還是金管局之內部研究亦要完善化呀?如要香港金融中心競爭力下跌,只係歸咎香港人接種疫苗不力,腦筋懶惰一啲喎!

果然好玩 籽在四方,即like「果籽」FB專頁!
BannerBanner