車位價1188萬 - 左丁山

更新時間 (HKT): 2021.06.12 02:00
資料圖片

最近山頂豪宅Mount Nicholson有大新聞,就係有人用3566萬買入三個車位,平均價係1188.66萬,屬歷來最高價,震動地產市場,發展商(九倉、南豐、會德豐)當然一早已經賺到盤滿缽滿,但相信老資格如梁志堅亦想唔到賣車位都可以賣得咁多錢。正是富貴逼人來,雖然對發展商來講,只不過係錦上添花啫,不過花係鑽石打造,收到啲都唔拘。

與此相比,著名練馬師賀賢與太太在大圍柏傲莊買入一個樓花單位,實呎501,涉資1150萬。賀賢馬房今個馬季所得獎金,截至5月23日,有三千萬元以上,練馬師得10%,賀賢收入三百萬,當然計死數就買唔起山頂豪宅。原來三百萬嘅收入都買唔起Mount Nicholson三分一個車位,唔怪得有口痕友苦笑:此乃現實,無法啦!富者愈富,係全球宏觀大趨勢,非獨香港為然。車位買家已知係上市公司德永佳集團(0321)太子爺潘浩德,德永佳創立於1975年。

創辦人係現集團執行主席兼執行董事潘彬澤,佢位公子潘浩德係執行董事,旗下零售品牌係Baleno(班尼路),賺錢主要來自布料及製衣。星期二(6月8日)股價收報1.81元,市值25億。論市值就冇乜睇頭,但大股東潘家老早收夠籌,身家大過公司市值,地產界消息話潘浩德早在2016年已買入兩伙Mount Nicholson,A座及B座中層,面積好大,買價七億四千九百萬元,今日應該值起碼十億以上,係德永佳市值之4成或以上,於此可見,香港豪宅有價,做實業賺錢遠不及在山頂買樓嘅!

香港疫情未散,樓價早已經沖閘復蘇,反彈力量大,預料今年中原城市領先指數又會破頂,Mount Nicholson當然係物以罕為貴,升值一早估到,但大圍樓盤咁好賣,咁好價,有啲出乎意料之外,足證本港市民之買樓購買力既廣且深,令樓市淡友大跌眼鏡。正因為樓價不會回落,令晨早排隊申請公屋之青年人愈來愈多,目前已要輪候5年半至可以上樓。何柱國係梁振英陣營一枝大炮,上陶傑節目「光明頂」大肆抨擊林鄭治理樓市無方,正係睇中林鄭弱點,集中火力攻擊,意圖逼林鄭放棄連任,林鄭或者會認為何柱國係另一個KOL,不屑回應,之不過,山頂車位賣1188萬,帶出朱門酒肉臭之形象,一定唔係music to her ears。

果然好玩 籽在四方,即like「果籽」FB專頁!
BannerBanner