MarcJacobs向香港文化致敬
琦琦、傅明憲排隊買LV紅白藍

更新時間 (HKT): 2006.10.15 08:00
LV近年勢如破竹,早前在中環開新店更成為城中熱話。 資料圖片

超級名牌LouisVuitton(LV)上周在巴黎舉行2007春夏時裝騷,主帥MarcJacobs繼多年前的紐約Graffiti、日本村上隆卡通手袋後,再次教人眼前一亮,模特兒一身LV春裝,手上拿着香港人熟悉的特產「紅白藍袋」,驟眼看只是袋面多了個LVstamp。英國《獨立報》率先戲謔這個LV與紅白藍的新組合是品牌歷來最「荒謬可笑」的手袋!香港時裝名人界對此有讚有彈,曾到LV總壇朝聖的傅明憲盛讚概念夠前衞,有親切感,她說:「開心香港文化走上國際舞台!」名模琦琦也表示一定買。 撰文:林妙萍、吳天慧

琦琦愛法國必買

「未親身見過個袋,不過設計幾有香港特色,加上紅白藍三色係代表法國國旗,我一定會買!至於定價就要睇吓係乜嘢物料,皮做嘅梗係貴啦,哈!如果係帆布就賣388蚊,中國人傳統好意頭!」

傅明憲撐港產恩物

「嘩,睇到都好開心!感覺好madeinHongKong(香港製造)。今次係香港文化走上國際舞台,作為香港人嘅我,感受梗係會特別深同有意義啦,我都好期待見到呢個紅白藍LV嘅實物。」

周嘉玲讚MJ有諗頭

「得意同埋唔出奇呀,因為MJ(指MarcJacobs)自己收藏藝術品,又鍾意popart。佢可能覺得紅白藍袋有代表性,將『平+實用』呢個概念美化,MJ一向玩極端,將低同高嘅兩種極端結合,好似幾年前將街頭嘅Graffiti畫落LV袋度,所以一啲都唔出奇!買就未決定,因為未睇到實物。」

鄧達智開心兼過癮

「好正!LV可以咁樣做,好過癮,開心到不得了!MarcJacobs應該就係咁,佢幫LV搵日本漫畫師村上隆,又用香港嘅紅白藍膠袋,係向世界上唔同嘅文化致敬!我唔覺抄襲喎,呢個係大圍嘢,可能係啲小工廠做落,邊個設計都唔知,又冇版權。主要係佢感覺親切,好有舊香港人回鄉探親味道,代表咗香港地道文化。」

黃偉文一定唔會買

「我唔會買!返轉頭如果一個紅白藍膠袋印個LV花,可能我會囉,呢個玩笑開得太大喇。有香港文化嘅感覺,不過唔係好有興趣囉。香港嘅PacinoWan、GOD好多人玩過紅白藍,外國HelmutLang都有過。你問我邊個會買?我唔知喎,連最有可能嘅唯一趙靜儀都得罪咗,我真係唔知囉。」

AnaR.買袋重感覺

「我知道甚麼是紅白藍膠袋,我以前都用來搬屋,如果MarcJacobs有這樣的構思,我覺得很有趣,verynice!我未見過新一季的設計,如果是用膠質物料,與街賣的一模一樣,不同的只是多個stamp,我就不會買。若果真的感覺不同又特別,花數千蚊都沒有所謂,畢竟我都很喜歡LV。」

馬詩慧嫌貴未必買

「紅白藍袋係咪我哋平時用嗰種呀?如果LV嗰個質地係一模一樣,我梗係唔會考慮買啦,因為自從結婚生仔,我都變得精打細算咗,既然已經有(紅白藍袋),就唔會買,至於定價,我估最少要幾千蚊啦,話晒都係LV。」

鄭詩韻嫌棄唔啱Feel

「我唔會買!雖然我覺得個idea得意,而且個pattern又唔係真係好紅白藍feel,反而似VivienneWestwood嗰種英倫tartan格仔。不過我真係唔會買,第一,個袋嘅shape係四方大手挽袋,孭唔到上膊,好唔方便;第二,個mood斯文返工又唔係,去玩又唔係,唔知幾時啱用。」

娛聞樂陪你走遍全球追星,即Like「娛果」FB 專頁!
BannerBanner