Kelly祖兒加入反國教大軍
黃貫中:誰也綑綁不了

更新時間 (HKT): 2012.09.02 05:20

踏入9月,國民教育科洗腦工程正式展開,之前九萬人上街反洗腦後,政府仍然不肯應民意撤回國民教育科,學民思潮繼續抗爭,不少藝人都撐這班年輕有為的學生。身為準父親的黃貫中心痛學生絕食,勸學生不要再自殘身體,學生們終答應會恢復進食。容祖兒也贊成不應硬生生洗腦,她認為應把歷史真相告訴學生,這對學生健康成長最為重要。

黃貫中:誰也綑綁不了

祖兒:講出真相

容祖兒前晚在灣仔出席網站頒獎活動,最近學民思潮為了反國民教育而提出罷課兼絕食,目的是不想做被洗腦的學生,對於學生的絕食行動,容祖兒表示支持,並說:「家啲小朋友有佢哋自己睇法,所以要正視呢個問題,我覺得應該全面話畀啲學生聽,件事係點樣發生,發生咗啲乜嘢事同原因,呢啲係直接影響小朋友嘅教育同成長,如果我哋唔行出一步,影響真係好大。」

Kelly:點解唔聽意見

陳慧琳育有兩個兒子,對於將來孩子的教育問題, 她和老公很關注,昨日她接受訪問說:「如果家有咁多反對聲音,政府係咪應該再延長諮詢期,等大家有咗共識先推行呢,既然大家都覺得國民教育科內容有問題,咁政府點解唔聽吓大家嘅意見呢?」

黃家強:同個仔轉校

黃家強昨日在金鐘出席公民教育開學禮活動時,他說:「今日我係以作為人父,帶埋老婆同個仔嚟支持呢班學生,學民思潮班學生咁有決心,做家長嘅點可以唔支持,梁振英呢個政府完全唔聽人講,只識做騷,咁多人反對國民教育,佢仲要執行,咁搞法以後香港小朋友只知愛黨,我唔想香港變成北韓 ,所以唔會畀仔女接受國民教育,我會安排同個仔轉校。」

歐陽妙芝:唔接受假嘢

本身是兩子之母的歐陽妙芝坦言心痛學生,她說:「做阿媽唔想睇到,好心痛肉赤,覺得佢哋勇氣可嘉,生命亦寶貴。自己接受香港教育長大,已經係好洗腦式嘅填鴨教育,冇晒信心,覺得佢哋好可憐,所以都係畀囝囝讀國際學校。啲學生發聲爭取自由,以前香港出名自由,點解近幾年多咗人出嚟爭取自由,做家長只想小朋友開心快樂成長。中國歷史係要認識,未清楚國民教育有冇洗腦成份,不過作為家長都唔想小朋友接受假嘅嘢,擘大眼講大話。」

龍小菌踩場

蒙面歌手龍小菌昨日以黑巾和黑超遮面,親到現場站在抗議牌前,握緊拳頭拍照放上微博,她留言力撐學生說:「反對洗腦教育!」網友則留言擔心這條微博會被河蟹。

彭浩翔:香港的驕傲

彭浩翔結婚後,雖然沒有生小孩,但他對香港政事十分關心,對於整個反國民教育運動,反而是一班熱血學生帶起,他是深受感動,昨日他在微博留言讚美他們:「學民思潮的同學,是香港的驕傲。」至於王晶看到學民思潮的同學沒有和梁振英握手,他在微博留言說:「如果從昨天起,所有人都不跟梁振英握手,只向他鞠躬,他會有甚麼感覺呢? 」

琦琦:講出港人心聲

與任達華育有一女的琦琦也支持學生的行動,她說:「好勇敢同支持,佢哋用少數聲音講出港人心聲,好值得推崇。政府聽到學校同家長反對都無動於衷,應該要認真諗清楚,要三思。小學應該着重學生德育發展,到佢哋大個有分析力,通過書本都知道歷史,所以覺得喺小學推行國民教育冇乜需要。由於我個女揀咗讀國際學校,冇呢方面考慮。」

娛聞樂陪你走遍全球追星,即Like「娛果」FB 專頁!
BannerBanner