電視撈飯:無綫劇闖懲教所禁區
王浩信阿滕拍到喊

更新時間 (HKT): 2013.10.28 05:20
滕麗名同徐子珊日前喺懲教所實景拍攝新劇《再戰明天》,睇嚟好逼真喎!

向來以紀律部隊做題材嘅劇集收視都唔錯,加上呢輪電視風雲風頭火勢,無綫開劇都要搞突破,拍咗兩輯《飛虎》嘅監製林志華,明年1月會開20集新劇《再戰明天》,以懲教署人員每日面對甲級重犯嘅故事做題材,劇情會有香港重犯嘅真實個案,演員有吳啟華、徐子珊、黃德斌同高鈞賢等,王浩信、單立文同滕麗名演囚犯,至於黃心穎BB同趙希洛就做懲教署學員。

心穎BB做啟華個妹

個劇籌備經年,日前去咗赤柱同最新嘅羅湖女子懲教所實景拍攝節目巡禮,其中阿滕嘅故事,講佢喺女子懲教所湊大個仔,期間遇到啲問題。見阿滕抱住個小演員狂喊,子珊係咁相勸,真係好鬼入戲!而劇中本來係懲教人員嘅王浩信,因為犯咗法,最終自己都要坐監。監製林志華噚日喺電話度話:「我哋去咗監獄嘅實景禁區拍,懲教署安排囚犯唔喺監倉,劇組至入倉拍,唔會影響佢哋嘅運作,好少機會喺實景拍監獄暴動場面,我哋今次都拍到!」

娛聞樂陪你走遍全球追星,即Like「娛果」FB 專頁!
BannerBanner