走進亞視 追憶八景

更新時間 (HKT): 2015.04.08 05:20

往事只能成追憶,亞視明年3月31日變舊迹,在亞視即將變成我們的集體回憶之前,本報邀請了宮雪花和黃集鋒引領大家進入2007年開始使用的大埔亞視總台,參觀八個亞視必看景點,訪問八個亞視藝員細說他們在電視台的生活點滴。

大堂

八廠

黃集鋒:2012年參加亞生,尤其呢個八廠,𠵱家冇開燈好黑,感覺成個八廠好空、好淒涼。仲記得我選嗰陣真係好熱鬧,𠵱家見到人走茶涼,見到都好心痛,同埋我選亞生時喺亞視門口影第一張相,我覺得唔會離開呢間公司,估唔到搞成咁。

記者室

張家瑩:正正喺大堂角落頭有一間房,記得我第一次入去,腳都震埋,因為我成日驚自己唔知講乜嘢,個腦空白一片,我記得自己嗰次語無倫次,係個好深刻回憶,我以後見到呢間房覺得好恐怖,唔想入去。

化妝間

筱靖:我最難忘就係化妝間,每一次開廠之前都喺化妝間等,我平日留得最多時間嘅,就係呢度。同埋之前台慶喺化妝間唔見咗錢,俾人偷咗幾千蚊,就係嗰件台慶失竊事件,呢個梗係令我留下最深印象喇!

服裝間

蔡國威:我做咗亞視20年做過好多綜藝節目,好多服裝都係公司提供,每次返去都會踏入服裝間,試身、度身,所以我哋同服裝間阿姐建立咗一個非常好嘅關係,就好似親人咁,真係乜都俾佢睇晒。

道具房

劉錫賢:道具房我梗係去過。記得以前廣播道係好雜好亂,你唔會知收埋喺邊度,如果漏單,真係唔知會放喺邊,但道具房同事可以即刻搵到畀你。搬入大埔個道具房就比較偏僻,比較大,同樣都係唔知啲嘢放邊。

Canteen

秦啟維:一個電視台最重要係canteen,如果啲人冇嘢拍就喺canteen吹水,久唔久有監製喺度,買杯嘢飲可以同啲編劇同埋監製傾吓,等佢知道你存在。以前拍劇出發前,都會聚集喺canteen,好似聯合國咁。

天台露天雅座

鄭伊娜:記得當時我加入亞視一年,有次我拍嘢拍到好夜,有工作人員話夜晚有燒嘢食叫我去,我去到竟然見到有過百人喺度,有啲員工同家屬一齊慶祝,見到個場面感覺好溫暖,原來亞視有呢啲員工活動。

娛聞樂陪你走遍全球追星,即Like「娛果」FB 專頁!
BannerBanner