【小龍女出山】有意接拍資助電影 陳玉蓮升呢做阿媽

更新時間 (HKT): 2016.08.06 12:46
(攝影:陳慧安)

陳玉蓮(蓮妹)、趙哲妤(Uny)、張羽希同謝高晉等,今日喺美孚為香港復康力量賣旗。蓮妹以復康大使身份出席,佢話噚日專誠喺佛山趕返嚟,因為復康力量有任何大型活動,佢都必定參與,但往年急急腳咁走,故今年就一於留多啲時間,希望每個地方都幫下手賣旗。

講到呢幾年都喺大陸山區做慈善,幫助山區有需要幫助嘅小朋友,蓮妹話:「o依家接咗5個細路仔一齊生活,跟住佢哋長大,有啲都已經20歲,自己幾個好朋友一手一腳去做,改變佢哋(小孩)嘅生活,佢哋感觸大過我。」

蓮妹話幾個朋友為慈善穿州過省,去啲偏遠嘅地方,除咗做自己喜歡做嘅慈善工作,連一啲慈善機構都會主動搵佢幫手取經、問番蓮妹佢哋如何發放資源去啲偏遠地方。

而4年前拍完大台劇後,蓮妹最近又再被打動出山,原來佢已經傾緊一部電影同一齣大陸劇:「o依家傾緊,未落實,其中一間係努力爭取到政府資助、好有心創作嘅電影,係要支持,獲資助嘅,一定會係好題材,好想拍,今次係講兩母女,我係做媽媽。」

而Uny就話9月會參與一個小型音樂會,唱3首歌,因為天生雞仔聲,所以要落好大功夫,一日練10個鐘,希望唱得好有人賞識,搵佢登台,仲可以出一隻真正屬於自己嘅歌。

娛聞樂陪你走遍全球追星,即Like「娛果」FB 專頁!
BannerBanner