【原著fans收唔收貨?】 《攻殼機動隊》造型曝光 北野武戴假髮演荒卷大輔

更新時間 (HKT): 2016.08.24 12:22
北野武戴白色假髮演荒卷大輔。

荷李活電影《攻殼機動隊》《Ghost in the Shell》今年6月由導演Rupert Sanders拉大隊到香港取景,女主角施嘉莉祖安遜(Scarlett Johansson)飾演機動隊少校草薙素子穿梭香港各地,當時同行仲有一頭白髮、飾演助手巴特嘅丹麥男星Pilou Asbaek,令其角色造型喺香港率先曝光。

《攻殼機動隊》先後喺新西蘭、香港、澳門及上海取景,近日網上終於有《攻殼機動隊》嘅一系列造型照流出,施嘉莉祖安遜以貼身打扮將美好身材表露無遺,除咗主角外,最令原著迷期待嘅仲有日本著名導演兼演員北野武飾演嘅公安9課課長荒卷大輔,北野武為忠於原作,以白色假髮扮演荒卷大輔,係佢相隔逾20年再拍荷李活片,而其他角色都相繼曝光。

《攻殼機動隊》翻拍自著名日本動漫作品,原著係出自士郎正宗手筆,之後押井守炮製嘅動畫版至今亦係經典之作,真人版電影安排明年3月底上映。

娛聞樂陪你走遍全球追星,即Like「娛果」FB 專頁!
BannerBanner