【一切從法開始】陳法拉戀上型爆前外交官 薛世恆復合無望

更新時間 (HKT): 2016.08.24 21:42

喺大前年同Neway太子爺薛世恆離婚嘅陳法拉,約滿埋無綫之後,去咗美國紐約進修,入讀著名學府茱莉亞學院的戲劇碩士課程,前排仲返香港做「暑期工」,同男神黃子華合演35場舞台劇《前度》。

今日有周刊報道話,回復單身之後嘅法拉,唔單止喺事業上有新轉變,連感情方面亦都有新開始。原來法拉喺朋友嘅介紹之下,認識咗一個曾任法國駐日外交官EMMANUEL STRASCHNOV,法拉呢個法國男朋友仔,本身係哈佛畢業兼且仲好熱愛中國文化,講得一口流利普通話,報道稱佢仲幫自己改咗中文名,叫「司馬諾」,依家主力搞自己創立嘅電腦程式Bubble,專門教人自己建立網頁同app。

報道仲話呢段戀情開始咗半年時間左右,法拉為咗保護呢棵愛苗,一直低調處理,不過男友都爭取時間陪法拉,前排仲專登陪法拉返香港拍廣告。完成咗舞台劇演出之後,法拉單拖離港,不過佢今次唔係直接返美國開學,反而係先去歐洲放假,之後先返紐約開學。

至於前夫薛世恆方面,報道話太子爺一直都希望法拉復合,雖然身邊有一個拍拖5月嘅圈外女友,但係一直都低調處理,希望法拉回心轉意。《蘋果》今日都有向法拉了解,但係暫時未聯絡上。

娛聞樂陪你走遍全球追星,即Like「娛果」FB 專頁!
BannerBanner