【堅有米】準備花千萬收購酒莊 廖碧兒:有好消息會宣佈

更新時間 (HKT): 2016.10.10 16:23

陳寶珠、薛家燕、廖碧兒(Bernice)及琦琦,今早去到山頂為香港乳癌基金舉辦嘅「乳健同行2016」步行籌款擔任大使。強調每月定期自我檢查乳房嘅陳寶珠指,o依家嘅食物、工作壓力及空氣等,都會係構成乳癌風險嘅因素,寶珠姐話:「早啲知道並接受治療就有機會復原,我每個月都會自我檢查,每年接受一次檢查,新抱年紀輕更加要留意。」家燕姐喺台上話,如果寶珠姐唔記得,佢可以代勞為佢做乳房檢查。

家燕姐話乳癌係婦女頭號殺手,不容疏忽,家燕姐話:「有3樣嘢缺1不可,就係要自摸,睇吓有有異狀物體,40歲以上要定期檢查,每隔兩年要做X光影檢查。食嘢生活習慣要留意,唔好食過量激素,大閘蟹我都係食1隻,開心就兩隻。」

啱啱喺法國返嚟嘅廖碧兒,最近因為正值葡萄收成期,所以特別忙打點紅酒生意,Bernice喺法國擁有葡萄園,佢正計劃收購酒莊,預算花上7位數歐羅,即近千萬港紙,Bernice話:「o依家睇緊,有好消息會宣佈,裝修成本都大,要儲耐啲錢。」Bernice透露,佢有唔少紅酒珍藏,數量夠佢飲一世,同時佢收藏咗一啲同自己及家人有關年份嘅紅酒,Bernice話:「家姐同佢小朋友嘅年份都有。」

娛聞樂陪你走遍全球追星,即Like「娛果」FB 專頁!
BannerBanner