【彤叔設靈】娶周翠英73年不敢納妾 鄭裕彤:太太會閹咗我!

更新時間 (HKT): 2016.10.12 20:43

彤叔與指腹為婚的妻子周翠英結婚73年,一生對太太專一,人前人後都表現恩愛,他相當尊重太太,他曾在受訪時講過:「一生人之中,老婆對我最重要,我當然愛我老婆啦!」當記者問他有否效法賭王何鴻燊納妾,他風趣地答道:「我冇呀,太太會閹咗我!」

彤叔生前對後輩敦厚隨和,身邊都不乏紅顏知己,當中有演藝圈中的,最為人熟悉的可算是有「鄺美人」之稱的鄺美雲(Cally)及彤叔契女葉璇。Cally由於曾與彤叔次子鄭家成拍拖,於80年代已認識彤叔,85年一度傳出Cally與鄭家成秘密登記註冊,可惜二人最終分手。Cally雖做不成彤叔媳婦,卻仍與鄭家有緊密聯繫,是前男友兒子的契媽外,與彤叔相識30年,視對方為敬重的長輩。

Cally於2000年投資千萬開珠寶店,獲身為珠寶大王的彤叔到場力撐,在生意上提供了不少營商秘訣給對方。Cally接受《蘋果》電話訪問時,對彤叔讚口不絕:「彤叔平易近人,謙虛寬厚,係一個好值得敬重長輩。」問到彤叔有否教她人生哲理,她表示:「他曾提點我,做事要努力不懈,待人要真誠親切!廣結善緣,自能事事如意!」在Cally心目中,彤叔是一個值得大家學習的對象:「佢真係好好人、好親切,我未見過佢嬲,永遠都好好笑容、好親和,對個個人都好好,唔會分階層,廣結朋友,做生意,佢教曉我要誠信、專業、信譽好。」

另外,彤叔曾與99年國際華裔小姐冠軍葉璇傳緋聞。其實葉璇早在美國波士頓讀書時認識彤叔孫兒鄭志剛(Adrian),葉璇回港發展演藝事業時才碰上鄭志剛爺爺彤叔,兩人即成忘年交,05年更因此上契。

葉璇很欣賞彤叔的大智慧,上周獲悉彤叔死訊,她即傷感說:「非常懷念他,聽到這個消息很難過。」對於彤叔生前逸事,葉璇日前在電話訪問中說:「關於契爺有好多印象深刻回憶,我同佢個孫Adrian認識先,我哋一齊喺波士頓讀書,佢喺哈彿,我喺Wellesley College(衞斯理學院),我哋唔同學校,我男友係佢學長,佢哋住同一宿舍,所以我哋成日聚會。」

葉璇選美後直入娛樂圈,她在一次順德樓盤剪綵活動上遇見彤叔,她憶述:「呢個老人家慈祥、有智慧、幽默風趣,我當時剛到香港,唔知佢咁有錢,傾偈時講開,先知全世界有百分之四十鑽石係佢,巴士、周大福又係佢,因為佢言行平易近人,平時好節儉,唔係土豪。嗰個年代唔會好似o依家互聯網咁發達,我只知佢係德高望重嘅長者,平時出入只係坐Lexus(凌志)日本車。」

05年除夕夜舞會,彤叔邀葉璇出席舞會,兩人大跳貼身舞,葉璇回憶當晚笑爆嘴趣事:「睇到台上穿芭蕾舞衣表演嘅男女,佢哋好似着咗『虧佬褲』,我笑問契爺敢唔敢着住跳舞,佢話唔好啩。當時有傳媒報道我哋舞池跳舞,契爺金句話:『喺舞池唔跳舞,唔通睇書?』」

葉璇大讚契爺對她關懷備至,生活工作上遇上任何事,彤叔都是她的分享對象。葉璇說:「無論開心同唔開心,我都同契爺分享,佢知我同男朋友嗌交,仲好耐心同我男友講電話。呢位老人家和藹可親,我冇親人喺香港,佢親切到好似父親咁。所以有次飯局上,友人見我哋咁好傾,就話不如上契。」

葉璇06年推出自傳《璇攻略》,不避嫌請契爺題字:「佢留畀我嘅回憶都係美好,好感人,我諗起都鼻酸。」話筒更傳出葉璇哽咽聲:「佢留低世上太多美好事畀人,佢待人從沒有要求,係非常值得懷念嘅老人家。」

娛聞樂陪你走遍全球追星,即Like「娛果」FB 專頁!
BannerBanner