【金牌司儀】計劃出相集 鄭文雅請何守信做model

更新時間 (HKT): 2016.10.16 15:46
攝影:馬建華

鄭文雅、雷安娜、鄧建明同雷有暉今朝去到大欖郊野公園,出席港台舉行遠足活動,藉歌聲及簡單健身操跟現場觀眾宣揚職安健訊息,適逢今日係何守信76歲正日生日,當何B為起步禮倒數時,大會送上蛋糕畀佢驚喜,令阿B非常感動,熱愛攝影嘅鄭文雅亦把握機會紀錄這一刻。

何B表示近年甚少慶祝生日,太太已經傳短訊送上生日祝福,問到生日願望?佢話:「大家開心,平安健康,感恩就可以。」同鄭文雅久未碰面,佢仲記得當年係1979年,跟黃霑一齊主持當屆香港小姐,同鄭文雅傾完偈之後,大家都唔記得咗係咪向鄭文雅問緊問題,何B話:「當時好幾年都係我同黃霑一齊做,大家好夾,佢成日話正規嘢等我記,現場即興嘢等佢講。」

本月尾就同老公結婚25周年,鄭文雅指冇特別慶祝,最重要係老公送有幸福感覺嘅禮物畀佢,佢話:「今日佢驚我唔識揸車嚟,都車我嚟。」佢表示老公多年來凡事都支持佢,尤其近日咁忙都體諒佢,鄭文雅話:「近排我影緊本相集,係搵嚟百多位同我有密切關係同聯繫嘅朋友,好似譚詠麟,另外我今日都想搵何B影,因為當年我參選時係佢做司儀,佢係至今唯一嘅金牌司儀。」

娛聞樂陪你走遍全球追星,即Like「娛果」FB 專頁!
BannerBanner