【考古時間】幼齒陳展鵬影model相:呢隻叫木村風

更新時間 (HKT): 2016.10.20 21:28

呢期除咗流行講40歲以上嘅女星之外,仲流行發掘出土文物《YES!!》……搵番晒啲星廿幾年前青澀樣,除咗有選過校草嘅袁偉豪同黃宗澤之外,仲有呢位——拳佬陳展鵬(煎pan)。

睇返本出土文物,見到陳展鵬入面有兩個look,一黑一白,真係世界級。先講黑衫look,簡直就係「本土MK Look」嘅表表者。煎pan身穿黑色恤衫,唔扣最高兩粒鈕,條領有咁開分咁開,衫袖輕輕一摺,扮晒隨性咁。下身一條黑色吊腳「火焰喇叭褲」,一邊褲管成條洗水洗到一撻撻嘅漸變。個頭就染成啡金成七三分界,gel到啲陰一支支篤住隻眼,「本土MK Look」就是這樣煉成的。

另一個白衫look,煎pan身穿白色V領print tee,下身一條白色修腳褲,加對白色鞋,本身就好似一個MK白馬王子咁,但係無啦啦加件超短身牛仔恤衫喺面,成件事又係錯晒,加埋兩手揈揈嘅pose,又點會估到佢今時今日變成一個硬橋硬馬嘅拳佬呢!

唔知大家鍾意MK陳展鵬定係o依家成熟拳佬多啲呢?

陳展鵬嘅《YES!!》陳年舊相曝光,佢短訊回覆﹕「証明冇整過容,食咗幾年死貓。(係咪MK風?)係木村拓哉風。」

娛聞樂陪你走遍全球追星,即Like「娛果」FB 專頁!
BannerBanner