【細細個就聽溫拿】同溫拿一齊影海報 太極:聽歌開party媾緊女

更新時間 (HKT): 2016.10.25 17:42
( 攝影:陳俊強 )

樂隊溫拿同太極今日喺柴灣為「純音樂LIVE 2017」拍攝宣傳海報,影相時,攝影師安排排頭位嘅阿倫(譚詠麟)企喺木箱上,當兩隊樂隊大合照時,彭健新拎住頸巾,叫大家扮拉頭馬嗌「馬到功成」,十分搞笑。事後阿倫話:「第一次影相要企木箱,因為要就番鏡頭。」

阿倫笑言溫拿造型似英國劍橋護老院,又取笑彭健新胸「墮」,佢話:「上年食大閘蟹,激素未散。」鍾鎮濤(阿B)聞言即打拍阿倫個胸話:「好有少女風味!」成班玩到好似大細路咁。

兩隊樂隊首次同台合作演唱會,屆時會互唱對方歌曲。屆時11個男人同台,阿倫笑住話:「陽氣好重。」

溫拿話晒係前輩級,問到佢哋諗住點同太極對撼﹖阿B笑笑口話:「我哋好和諧,係交流。」咁大家會否操練一下﹖阿倫挺直條腰笑住話:「『粗』咗啦!仲『粗』?」

太極表示以前好鍾意聽溫拿玩嘅英文歌,即係細細個聽溫拿歌大﹖太極話:「我哋細個聽歌開party媾緊女。」雷有暉就話:「彈結他通常媾到女。」HiFi德(劉賢德)話:「唔係嘅,鼓手勁啲!」反而同戴夢夢拍拖嘅Ricky(朱翰博)未有出聲,反而微微向後退。

娛聞樂陪你走遍全球追星,即Like「娛果」FB 專頁!
BannerBanner