【儲齊三條King】33歲鄧上文再陀B仔 鄧英敏:玩「三公」殺晒

更新時間 (HKT): 2016.11.03 15:52

藝人鄧英敏囡囡鄧上文今年33歲, 05年港姐獲選為「最上鏡小姐」,10年3月同老公Andrew結婚,之後三年抱兩,喺11年12月生大仔Maddox(樂然),兩年後再追到個細仔Luca(樂天)。

日前讀者Vic透過「爆相爆片」報料,話當日早上9點幾,見到鄧上文同相信喺佢奶奶嘅外籍女士,一齊去到將軍澳嘅母嬰健康院覆診。Vic話鄧上文入去時戴住口罩,坐低冇耐之後先除低,現場見到鄧上文個肚都好大,似有咗7、8個月身紀,Vic話:「見到佢熟口熟面,所以認得佢。佢等咗大概一個鐘左右就去見護士主任,相信佢會喺私家醫院生。」

鄧上文接受《蘋果》電話訪問時,承認再懷第三胎,佢話﹕「7個幾月,今胎都係囝囝。(計劃之內?)Yeah!(想唔想追番個囡囡?)未諗呢啲,但同老公都鍾意big family。」由於已經有生仔經驗,鄧上文話心情唔係太緊張,但希望可以同之前兩胎一樣順產。

唔經唔覺,鄧上文離開無綫已經5年,佢話自己o依家係全職媽咪,問有冇興趣復出拍劇?佢話:「我o依家大住個肚,應該都有段時間唔會做嘢,但之前間中會接啲MC或同小朋友有關活動。」

將會第三度做公公嘅鄧英敏回覆《蘋果》時,字裏行間都難掩喜悅嘅心情:「我梗係開心啦,因為出年我又做公公喇!事關我最上鏡嘅靚女鄧上文,佢將會三度成為媽咪。佢目前已經有兩條King,一個係5歲大嘅Maddox,另外一個係3歲大嘅Luca;再加埋出年年頭出世嘅呢條King,咁即係話手上有三條King。無論你玩『三公』又好,『十三張又好』,都殺晒㗎喇!哈哈哈!」

鄧英敏仲讚個女比自己勇,佢話:「我生兩個,Sherman將會生第三個呀。」

娛聞樂陪你走遍全球追星,即Like「娛果」FB 專頁!
BannerBanner