【限韓令?再升級?】韓星廣告驚傳禁播 三大男神受牽連

更新時間 (HKT): 2016.11.19 12:09
金秀賢

大陸今年8月爆出「限韓令」,叫停南韓藝人喺大陸嘅活動,韓星近年亦絕跡大陸,轉移到台灣及香港等地搵銀。

之前已有不少韓星受牽連,好似韓國歌手黃致列喺大陸已拍攝嘅鏡頭被刪鏡頭及將佢樣子打格仔,亦有唔少韓星騷取消,或者出演角色被換角等,就連李英愛事隔10多年再復出拍劇嘅《師任堂》,亦一直未通過大陸審批。

而近日微博就傳出限韓令再度升級,當中一個名為「衛視觀察生」嘅微博就爆料話:「剛接到通知,即日起,江蘇電視台(江蘇衛視、江蘇省台地面各頻道)均不給播有韓國明星代言的廣告片。廣告片中涉及到韓國人的,請立即更換廣告片。」似乎限韓令已蔓延到廣告界。

如果消息屬實嘅話,韓國三大男神金秀賢、李敏鎬同宋仲基就會首當其衝受到影響,事關佢哋喺大陸廣告多到接唔停,喺今年嘅「韓星中國收入排行榜」中仲穩坐頭三名,當中金秀賢雖然自《來自星星的你》後未有新劇播出,但佢喺內地嘅廣告代言就已經超過30個,成為韓星之冠。

另外,有指金秀賢主演嘅《Real》將於明年初喺中韓同步上,不過唔知會唔會因為限韓令升級而有所變數。

娛聞樂陪你走遍全球追星,即Like「娛果」FB 專頁!
BannerBanner