【彭家麗細佬】新秀入行專演爛仔收數佬 無綫前綠葉彭皓鋒三度改名轉運

更新時間 (HKT): 2016.12.15 20:51
彭皓鋒喺演咗16年路人甲,離巢後幾經轉折憑《衛子夫》打入大陸市場。

綠葉,永遠都係用嚟襯托主角;因為百搭,接觸到嘅角色可能比一班星班演員仲多。喺大台奮鬥咗16年嘅彭家麗細佬彭皓鋒,於本港時間今日,喺美國入圍「US Hollywood International Film Festival」拎咗個「最佳男配角」獎,非常威水。

彭皓鋒原來參加過第15屆新秀歌唱大賽第二次複賽,同屆仲歌手仲有何韻詩、鄧健泓,不過未比賽完,就已經俾大台藝訓班揀中加入電視圈。彭皓鋒曾喺《蘋果》專訪中講過,初出道收過好多嘉許信,但呢16年嚟拍過嘅劇超過50套,但好多角色連名都冇,唔係叫流氓甲、收數佬呢類,就係叫阿強阿壯呢啲路人角色。

大台事業失意,彭皓鋒無奈過檔加入香港電視,參演過嘅劇集都係得一套《警界線》,之後喺大台金牌監制梅小青同劉家豪搭路之下,幫佢喺大陸古裝劇《衛子夫》搵到個角色,當時有指每集報酬有一萬元,仲打開埋大陸市場,事業翻身。

彭皓鋒喺事業上咁大起跌,試過改名轉運,由原名彭冠中,改為彭比得、彭國樑同14年改咗做彭皓鋒,終於俾佢博到,今日仲俾佢拎埋演員獎,證明咗努力,真係會有回報㗎。

娛聞樂陪你走遍全球追星,即Like「娛果」FB 專頁!
BannerBanner