【不斷更新】YOSHIKI兩度鞠躬嗚咽:明日留港開免費騷

更新時間 (HKT): 2016.12.29 22:05

日本樂隊X JAPAN團長兼靈魂人物YOSHIKI原定今晚喺亞洲博覽館舉行其世界巡迴演唱會《YOSHIKI Classical Special with Orchestra – HONG KONG》,原定今晚8時假亞洲國際博覽館舉行,但大批歌迷及傳媒到場後,睇機鐵站及亞博館張貼之告示,才知今晚個騷突然取消。亞博館更發聲明,解釋謂由於活動未能取得相關牌照,經與主辦單位磋商後,決定取消。聲明又代表主辦單位(大名娛樂與PUFFIN)致歉。

戲劇性的是,亞博館發聲明稱取消,但主辦機構公關遲遲不交代,大會現場公關對此事茫無所知。至7時35分,即開騷前半小時左右,YOSHIKI於twitter話如期舉行,呼籲歌迷唔好走。但機鐵及亞博館繼續出announcement,稱個唱取消,呼籲歌迷離開。

更加戲劇性係,7時45分,主辦機構公關終於現身,宣佈個唱開番,但同時亞博館方面堅持,到目前為止仍然係——宣佈取消。現場持票歌迷未能入場,YOSHIKI再於twitter出Po,再次重申:「香港⋯我已預備好去表演,但他們不會讓我(演出)⋯仍然在商討⋯不便之處敬請見諒。」至9時10分,YOSHIKI宣佈因技術上問題及牌照問題,今晚個唱取消。

今次YOSHIKI亞博館個唱之主辦單位為大名娛樂與PUFFIN聯手舉辦,票價由$580至$1,280;VIP Package索價$1,800,名額只限200個。PUFFIN已有多年舉行日本演唱會之經驗。

時序表:

19:04:機鐵站告之持票市民不要再入亞博。傳媒向現場公關查詢取消原因,公關亦表示不清楚。

19:23:亞博館方面正式發聲明,解釋謂由於活動未能取得相關牌照,經與主辦單位磋商後,決定取消。聲明又表示:「主辦單位就此向公眾致歉,敬希見諒。亞博館一向十分注重客戶服務質素,對是次活動取消深表遺憾,至於有關活動門票的退票安排,請與主辦單位聯絡。」

19:26:主辦機構公關稱將有人交代事件。

19:30:本報致電搞手之一大名娛樂負責人趙偉林,對方只稱:「依家仲處理緊!」即匆匆掛線。

19:35:YOSHIKI於twitter話如期舉行,呼籲歌迷唔好走:「在香港會場外的歌迷,(演唱會)並不㫕人取消的。我們會做那個騷,請等待直至問題解決。」

19:45:主辦機構公關現身,宣佈個唱開番,稱是技術性問題,一度決定取消,現時會比原定遲半小時開騷。場館仍開廣播,稱個唱取消,有歌迷不知道重開已搭車離開。

19:56:亞博館方面堅持目前為止仍然係宣佈取消。

20:05:現場持票歌迷仍未能入場。

20:25:YOSHIKI再於twitter出Po,再次重申:「香港⋯我已預備好去表演,但他們不會讓我(演出)⋯仍然在商討⋯不便之處敬請見諒。」

20:34:超儀今晚本來去捧Yoshiki場,《蘋果》問佢知唔知今晚取消,準備出門口嘅佢都覺得好突然。佢話:「佢本身係朋友,喺L.A識得佢,今次特登嚟捧佢場,約好咗嚟睇佢個SHOW,依家取消好可惜,都唔知咩原因。」

8時半,超儀聽到會再開show,即又趕返現場。她稱:「本來已返咗屋企,知道開到即返嚟,但就都唔知本來取消原因。」問陳子聰呢?佢話老公喺屋企放屁,話好期待呢個show。再問及健康情況,超儀稱:「佢咪成日喺屋企放屁囉!」之後超儀助手仲反問記者知唔知個show仲開唔開。

20:43:負責人話未入得場原因係票務處尚未重開,有觀眾仲未攞到飛,仲有考慮散場會比原定時間夜,所以要確定散場交通才可開始。

21:00:到今晚9點,即係原定開騷時間後一個鐘,觀眾仲未入到場,但冇人鼓譟,反而有歌迷喺場外主動嗌「We are X!」,現場氣氛同歌迷情緒仍然高漲。

21:22:最新消息是,已購票的歌迷,如選擇不退票,明日可憑票到會場,登記做會員,就可以多帶一個朋友,到亞博館欣賞原定今日舉行之演唱會。至於牌照及技術上之問題,亞博館方面稱是主辦單位問題,故開騷前主辦單位需解決上述問題。稍後亞博館將再發聲明。

21:30:PUFFIN宣佈明日將以私人活動性質免費開騷,今晚全部飛退回現金。

21:32:食環署表示,該署並無收到有關活動的臨時公眾娛樂場所牌照申請。而PUFFIN方面承認申請時「做漏咗啲嘢」。

21:46:大份主辦嘅大名,旗下藝人范振鋒今晚有去YOSHIKI開騷,結果撲空好失望,佢話:「現場好亂,根本唔知消息,大家要睇住手機即時新聞,我幾鍾意佢啲歌,嚟到知冇得睇好可惜同失望,尤其Yoshiki出嚟交待時,歌就全部好感動,有人喊晒,依家歌迷陸續離開,因為好難截車,大家要等機場快線走。

娛聞樂陪你走遍全球追星,即Like「娛果」FB 專頁!
BannerBanner