【無聊影埋勁多珍藏】罕有晒珍藏泳照 「七公主」陳寶珠出相冊

更新時間 (HKT): 2016.12.29 19:44
有唔少係私人相嚟,寶珠姐話今次血癌基金作慈善用途。(攝影:陳順禎)
(蘋果日報)

陳寶珠今日喺中環一間咖啡店,出席佢授權著作嘅新書《青春的一抹彩色 影迷公主陳寶珠》記者會,七公主之一嘅馮素波同沈芝華,以及近百名粉絲到場支持。

嗰套書總共有3冊,除咗文字之外,最吸引嘅係有唔少珍貴嘅相片,由寶珠姐6歲登台至o依家,共200張相,有唔少係屬於陳寶珠嘅珍藏第一次刊登,當中就有一張寶珠姐着泳衣嘅相,佢話呢張相未見過街,係自己無聊影,佢仲話:「未出過街,嗰時天經返咗學,喺屋企冇嘢做影相留念。」寶珠姐話天經o依家喺大陸做緊舞台劇,所以今日嚟唔到,遲啲自己會上去探班。

嚟緊1月1日就係寶珠姐70歲生日,所以大會今日安排咗個大蛋糕預祝,至於正日就未必會外出慶祝。講到今次出書喺好朋友汪曼玲拉攏,又多得好多fans提供一啲舊相,佢話:「睇番啲相同書集可以話係百感交集,回顧一生行過好多路,有歡樂、有唔歡樂,明白人有順逆境,好多謝身邊朋友俾到正能量我。」今次嘅賣書收益,寶珠姐話會全數捐去佢擔任大使嘅血癌基金作慈善用途。

至於,一冊名為《玉女沒有秘密》嘅書,搵咗「七公主」成員、老拍擋胡楓、鍾景輝同梅雪詩做訪問。評論集《愛她想她寫她》就由影評人記載轉述陳寶珠嘅藝術演出成就。

娛聞樂陪你走遍全球追星,即Like「娛果」FB 專頁!
BannerBanner