【不斷更新《勁歌》頒獎禮】 克勤離開環球即有獎攞 奪「勁歌金曲金獎」

更新時間 (HKT): 2017.01.07 23:25

今晚係無綫《2016年度勁歌金曲頒獎禮》舉行嘅大日子,外傳離開同無綫不和嘅環球、轉投英皇懷抱嘅克勤會摘男歌手獎,但今晚克勤不在港,佢喺ig話:「有人話今晚TVB會有人過來湛江找我們⋯⋯」似乎…真係坐定粒六拎獎。今晚將頒約40個獎,其中20首勁歌金曲獎計分方式包括TVB Fun及港大民調。

至於金曲金,有傳係《城寨英雄》主題曲《從未知道你最好》,即係胡定欣、陳展鵬唱嗰首。何雁詩?吳業坤?似乎都冇行喎!

拎咗兩年金曲金嘅吳若希,大住個肚同Alex貼合照,話「今晚坐定定睇電視先」。隔岸花生,的確好極。

23:22:「最受歡迎男歌星」張敬軒,一上到台佢就話:「又多一座純金獎座,可唔可以講長少少唔好圈我住。」C君就即話﹕「得,報埋新聞都得。」之後軒仔就話:「再一次謝TVB,坦白講呢個獎對我嚟講係寄望多於肯定 呢幾年同所有男歌手一樣好努力,多謝TVB畀好多機會裁培我,特別多謝Herman,佢少數仲好相信音樂。過去呢段時間,無論係廣東樂壇定係本地樂壇都係好多艱難時間,我呢幾日係網上聽好多唔同聲音,無論前輩或後輩都係好,係好好鞭策嘅力量,希望大家做好音樂。」

23:10:頒發「勁歌金曲金獎」李克勤《一個都不能少》,「最受歡迎女歌星」就由容祖兒套得,但因為佢哋兩個喺內地開演唱會,所以專程去到內地頒畀佢哋。其實克勤一向同無綫嘅關係好好,不過因為當時無綫同環球發生版稅風波,有環球歌手身份嘅克勤,多年都冇攞到「勁歌」嘅獎,而舊年克勤一轉去英皇,就即刻攞到「勁歌金曲金獎」。祖兒得獎時話:「嘩,第12年,首先感激TVB,一個咁特別安排,好罕有,仲有權權(區永權),希望在場觀眾感覺到呢份喜悅。」而克勤就話:「多謝英皇,舊公司環球,今年唔好意思,無出席任何頒獎禮,但TVB專登嚟到,希望2017可以親身去,坐你(祖兒)隔籬,如果你仲去的話。」

22:57:「最佳演繹男歌星」許廷鏗,仲攞埋第二十首「勁歌金曲獎」《記住忘記我》,佢喺台上話:「多謝星夢一班同事。今日攞呢個獎對我嚟講意義好大,如果七年前無《超級巨聲》呢個舞台,就冇所謂唱功可言,要好好多謝嘅係《超級巨聲》嘅監製麥鎮東。跟住落嚟想多謝少少戰友,一路以嚟巨聲嘅朋友,Mag、小巧,Step、嘉儀,呢個想特別多謝一下,Hubert(胡鴻鈞),我好少當人兄弟,呢兩年都係後面撐住我。仲有一個,唔係巨聲》幫嘅欣宜,多謝你,係我在迷惘帶找去旅行、行山,好多朋友想借舞台,用我嘅歌詞講句,記住要共最美的人分享每個夜晚。」而許廷鏗就冇提過坤哥個名。

22:53:「最佳演繹女歌星」泳兒,仲攞埋第十九首「勁歌金曲獎」《獨一無二》,泳兒話:「《獨一無二》得金曲獎,多謝TVB,英皇娛樂,我唔敢講我係人人心中係最佳演繹,因為每個人有唔同風格歌、唔同演繹,但開心到大家認同。作為歌手用聲音演繹,仲有過去經歷,過去屋企人發生啲唔開心事,但可以令我將感情投入係唱歌裏面。」

22:44:「最佳合唱歌曲獎(金獎)」陳展鵬、胡定欣《從未知道你最好》(電視劇《城寨英雄》主題曲),同樣攞到第十八首「勁歌金曲獎」,胡定欣話:「多謝,好開心呀(司儀﹕開心會唔會錫架?兩個獎成雙成對)因為《城寨英雄》呢個劇集,令我哋由公司嘅頒獎禮嚟到呢個大party,畀我哋嚟到呢個特別晚上。」陳展鵬就話:「因為《城寨英雄》今我哋可以唱到呢首主題曲,多謝Herman、珍姐,呢首歌或者係今年最後一個獎,我希望有信心今年再多一首歌係同觀眾有共鳴。」

22:43:「最佳合唱歌曲獎(銀獎)」陳凱彤、鍾舒漫、許靖韻《我們仨》,佢哋三個喺台上話:「多謝公司英皇、TVB。死啦唔知講乜,呢個機會好難得,仲有兩個師姐,珍惜機會,多謝TVB。」

22:41:第十七首「勁歌金曲獎」鄭俊弘《一個人的永恆》

22:28:「最佳創作歌手(金獎)」同第十六首「勁歌金曲獎」,林奕匡《一雙手》

22:25:「最佳創作歌手(銀獎)」鍾舒漫,喺台上佢好感動,因為佢話自己未攞過創作歌手獎,仲一度想喊,不過就冇眼淚流出嚟佢話:「我唔知講乜,我第一次攞創作獎,我入行寫咗三十幾首歌。雖然好多冇plug,但真係幾好聽架,多謝daddy、媽咪,多謝我妹妹鍾舒祺。」

22:24:「最佳創作歌手(銅獎)」羅力威

22:12:「最佳唱跳藝人」狄易達

22:15:第十五首「勁歌金曲獎」胡鴻鈞《天地不容》(電視劇《殭》片尾曲),佢上到台先多謝TVB同星夢娛樂,之後佢:「監製作曲詞,及《殭》台前幕後,監製畀我唱片尾歌,同有角色。」

22:15:第十四首「勁歌金曲獎」吳業坤《百姓》,佢話:「多謝TVB,星韜娛樂,fans,多謝所有支持我朋友。」

22:14:第十三首「勁歌金曲獎」JW《矛盾一生》,佢喺台上話:「一定多父母、家姐,畀好多支持,仲有公司同fans。」

22:07:第十二首「勁歌金曲獎」陳柏宇《沒有你,我甚麼都不是》

21:53:「最受歡迎新人獎(金獎)」譚嘉儀 「最受歡迎新人獎(銀獎)」鄧小巧

21:52:「最受歡迎新人獎(銅獎)」HANA

21:51:「最受歡迎新人獎(優異獎)」鄭世豪

21:47:「最佳樂隊獎」Supper Moment,台上多謝已故經理人:「多謝唱片公司已故經理人Gary Chan,多謝TVB,有新節目介紹不同界別聲音畀大家,希望觀眾搵多啲唔同音樂。」

21:44:林志美唱出《偶遇》

21:38:第十一首「勁歌金曲獎」王浩信《不可告人》(劇集《致命復活》主題曲),佢喺台上:「多謝農夫,距離攞呢個獎已經係八年,多謝《致命復活》,多謝Herman,仲有我嘅百樂,樂小姐(樂易玲)。」

21:34:「最佳組合獎(金獎)」C AllStar,同時攞埋第十首「勁歌金曲獎」《專業失戀30年》,佢哋喺台上話:「首先多謝歌曲獎,作曲、作詞、監製、編曲,完成埋10月份演唱會,我哋要抖一抖,分開一吓,要多謝三位兄弟、屋企人。」

21:33:「最佳組合獎(銀獎)」小塵埃

21:31:「最佳組合獎(銅獎)」Super Girls,佢哋喺台上:「多謝TVB多謝HERMAN,所有同事,SUPER GIRLS第一次喺TVB攞獎,我哋會繼續努力,多謝C AllStar。」

21:28:第九首「勁歌金曲獎」陳展鵬《誰可改變》(劇集《巨輪II》主題曲),呢次係陳展鵬第一次攞到《勁歌》獎項。到咗陳展鵬唱歌嘅時候,音樂太大嘅問題就唔存在,可以好清楚聽到人聲。

21:21:第八首「勁歌金曲獎」何雁詩《愛需要勇氣》(劇集《致命復活》片尾曲),仲由佢自己頒獎畀自己。佢喺台上話:「多謝張家誠、寫詞嘅張美賢,好大壓力,呢首係我好鍾意嘅歌,多謝大家俾機會何雁詩做歌手嘅機會,係我年中派《最真心一對》後好大壓力,想每首歌都遇到咁多機會,畀機會何雁詩呢位歌手。」之後就唱出《愛需要勇氣》,不過都係同一個問題,就係音樂聲太大,人聲要好辛苦先聽到。

21:18:頒發6個「傑出表現獎」,得獎者分別有:洪卓立、JW、何雁詩、陳柏宇、林欣彤、鄭俊弘。

21:17:第五首「勁歌金曲獎」容祖兒《無人知道雙子座》、第六首「勁歌金曲獎」容祖兒《我好得閒》、第七首「勁歌金曲獎」李克勤《一個都不能少》。但Joey同埋克勤都冇嚟到頒獎禮,主持C君就話:「乜冇嚟都有獎攞?」

21:13:播出《勁歌》嘅第一代主持人,許冠傑嘅錄影片段,仲唱出《鐵塔凌雲》,之後就由鄭俊弘、羅啟聰、安俊豪,唱接住唱入去。

21:07:第四首「勁歌金曲獎」欣宜《女神》,盧敏儀一打開個得獎信封,就話:「你媽咪一定超開心。」之後一身公主打扮嘅欣宜上台:「Thanks so much,WOO,首多謝TVB頒呢個獎畀我,作曲藍奕邦、作詞黃偉文,仲有fans。」

20:58:盧敏儀上台先講到《勁歌金曲》嘅輝煌時代,因為佢係《勁歌》嘅第一代主持人,之後就要陳柏宇同林奕匡上台表演,不過音樂聲就太大,兩位歌手嘅人聲變好細。

20:54:張敬軒唱出《風起了》,之後到許廷鏗唱出《我的志願》。

20:53:第三首「勁歌金曲獎」張敬軒《風起了》,軒仔喺台上話:「多謝作曲,佢係澳門嘅音樂人,佢哋都需要一個舞台,多謝公司,多謝作詞嘅陳耀森。」

20:47:第二首「勁歌金曲獎」許廷鏗 《我的志願》

20:46:第一首「勁歌金曲獎》張敬軒《羅賓》

20:30:杜麗莎獻唱《眉頭不再猛皺》、《愛是永恆》、《I've Got The Music in Me》開場。

娛聞樂陪你走遍全球追星,即Like「娛果」FB 專頁!
BannerBanner