【馮盈盈得季軍】自由神像帽變后冠 余思霆贏華姐冠軍

更新時間 (HKT): 2017.01.15 22:58

國際中華小姐競選今日喺馬來西亞舉行,大台都係照樣要播,一班佳麗都係表演下啲才藝,又要答下主持曾志偉、阮兆祥等人嘅問題咁囉……例牌啦,呢班平時講開英文嘅佳麗,就要用半鹹半淡嘅廣東話答問題。

最終冠軍由紐約代表11號嘅余思霆當選,佢今晚發揮都幾唔錯,首輪着民族服裝出場嘅時候,頭頂戴住個自由神像頭帽,以騎呢搶晒鏡,之後才藝表演時就踩住滾軸溜冰出場,臨尾仲轉圈落地做出一字馬,梗係睇到拍爛手掌啦。

至於寸過陳凱琳嘅大熱5號林宣妤,最終只係憑住主場之利得個亞軍,而香港代表馮盈盈今日有苟姑娘苟芸慧喺活動上點燈,最終都有季軍落袋。而友誼小姐呢,就由一早出咗局嘅4號李虹臻奪得。

娛聞樂陪你走遍全球追星,即Like「娛果」FB 專頁!
BannerBanner