【行船跑馬三分險】拍戲學騎馬打定底 江碧蕙:有急才先識應付

更新時間 (HKT): 2017.01.20 19:12
江碧蕙同男友拍拖冇耐,屋企人都知道有新戀情!(攝影:張俊銘)
(蘋果日報)

首位華人女騎師、已為人母嘅江碧蕙(Sherie),獲邀擔任一間美容院代言人,今日由拍拖數月嘅法籍男友Jerome陪同,去到銅鑼灣出席發佈會。Sherie指男友係法國、西班牙、波蘭混血,喺香港教授網球,Sherie話:「我哋拍拖數月,喺party中認識,大家鍾意運動同打golf,小朋友知我有新感情,新一代好開放,屋企人坐埋一枱都知。」

對於劉德華拍廣告墮馬受傷,教授騎馬嘅Sherie話:「好多明星女仔跟我學騎馬,要拍嘢唔識騎馬好蝕底,佢哋學騎馬為自己打底,馬匹有舉動時要有急才先識應付。」講到華仔傷勢,Sherie話:「好難講,行船跑馬三分險,簡慧榆跌落嚟就冇咗,跌落嚟睇運數,要睇吓當時點跌。」

Sherie回想一次與華仔碰面,佢話:「我哋冇合作過,做騎師時曾經喺首映見過,佢問我咁細粒係做咩職業,佢話乜有女騎師嘅咩?我同Aaron(郭富城)熟啲,因為佢有出席馬會活動。」講到演員騎馬風險,Sherie建議接觸馬匹前,先學騎術冇蝕底,講到過往受傷經歷,Sherie話:「幸好咁耐我最傷都冇斷過骨,最嚴重視網膜傷咗,見到有4個影。」

跟江碧蕙學騎馬嘅陳蕊蕊話:「試過騎馬被前面隻馬踢到小腿,瘀足幾星期,細個時又唔識,企喺隻馬後面,被踢到成個人彈開。」

娛聞樂陪你走遍全球追星,即Like「娛果」FB 專頁!
BannerBanner